童年陰影(二)被遺棄嘅感覺

童年陰影(二)被遺棄嘅感覺

細個每逢星期日,阿爸阿媽同我三個都會去碼頭隔離嘅石壆玩,正確嚟講應該係陪阿爸玩。

嗰陣碼頭一帶嘅樓仲未開始起,得一大片爛地,而對出係一段好長嘅路,即係而家嘅海濱公園。

阿爸好鍾意喺石壆度放紙鳶,一放就大半日,而我同阿媽就通常喺一個小型釣魚台度玩釣魚,間中阿爸都會join埋一齊釣,阿媽有時仲會準備三文治之類小食,喺嗰度一齊開餐。

其實都幾溫馨呀。

點知有一日,阿爸玩到下晝兩三點,我就開始嘈住想走……

「媽咪媽咪…我想去麥當當食雪糕同埋薯條呀…爸爸幾時走呀?」

阿媽唯有不停氹住我:「玩多陣走架喇……飲埋杯氣水就走……」

差唔多天黑,我終於見到阿爸執野喇,我好興奮咁同阿媽講:「媽咪,爸爸走喇……好野!」

等左成日終於等到,當我拿拿林執好晒野打算去不遠處會合阿爸,但係我搵呀搵……搵來搵去都唔見阿爸,好似突然消失左咁。

殊不知一轉身,阿爸騎住單車飛快咁從我眼前呼嘯而過,佢瞬間變成我嘅目標人物,我起勢咁喺後面窮追,一邊大叫:

「爸爸……爸爸……等埋我呀……爸爸……」

長長嘅石壆上面映照住阿爸嘅身影 ,
我用盡奶力仍然追唔上單車嗰兩個輪……

最後我放棄了,跑到上氣唔接下氣嘅我,就咁坐左喺地下……

「點解爸爸咁都聽唔到我叫佢嘅?」

我唯有眼睜睜咁望住阿爸個背影,慢慢咁同日落一齊消失喺長長石壆嘅盡頭……

(其實係一個幾靚嘅畫面!)

失敢、灰心、自責、不安……同時混合埋一齊,一種奇怪嘅感覺慢慢爬上心頭,我覺得自己好似一隻被遺棄嘅狗仔。

回過神來,終於聽到阿媽遠處嘅呼叫……

原來喺我追住阿爸嘅同時,阿媽亦喺我後面搏命咁追住我。

後來最後有無食雪糕,我已經唔記得了。

但係就好記得嗰晚阿媽哦左阿爸成晚……

「個囡等左你成日,想話等你玩完一齊去食雪糕,點知你轉頭一支箭咁走左去……個囡喺後面係咁追住你呀…你就踩住架單車,眼尾都唔睇下個囡……」

(下刪幾百字)

 

文: A312

Photo: RGV Cycling

啱睇就Like埋我地個Facebook專頁

歡迎各位讀者踴躍投稿,來稿請電郵至 info@menjap.com

Leave a Comment

Your email address will not be published. Required fields are marked *