長洲啲嘢食真係越來越貴

長洲啲嘢食真係越來越貴

一年總會去一兩次長洲,其實去到都係周圍行,食下嘢,無乜特別,純粹係想遠離市區,當係畀自己抖吓氣。不過近年長洲越來越多人,嘢食亦都越來越貴,已經減低咗想去嘅意欲,有時都會轉去大澳或南丫島,不過今日一場嚟到,點都要食啲嘢嘅,而家就同大家開心share。

漁樂(長洲大新海傍路81B地下)

成間嘢好日式feel,好似係新開,以前都唔多覺。魷魚即叫即炸,口感軟硬適中,脆粉好薄,一啲都唔油膩,加埋沙律醬,檸檬汁仲有個唔知咩汁真係好好味!最重要係有個女仔好用心咁放埋菜絲,提子同酸瓜,食魷魚配提子我真係第一次見!提子仲要係好甜皮薄唔澀嗰隻,真係難得嘅誠意小店,嚟長洲必食!唯一唔好嘅係粉量太少,食完覺得唔夠喉。

故鄉俱樂部(長洲教堂路17號地下)

我次次嚟都會食蟹籽蟹柳腸仔手卷,材料唔係咩貴嘢,咁就$28,但係呢三樣嘢加埋一齊又真係好鬼好食,仲要係食到底都仲有餡,平時食手卷通常食完頭幾啖就得返飯同紫菜,好無癮,溫馨提示:紫菜好快稔,拎完快啲食。

天然甜品(長洲大興堤路9號海景樓C座地下)

入長洲一定會食芒果糯米糍,呢度賣$8一粒,芒果好甜,外皮煙韌好味。豆腐花涼粉朱古力雪糕唔掂,涼粉正常,朱古力雪糕麻麻哋,豆腐花酸酸哋,如果想食豆腐花就去手卷隔嚟嗰間食。

允升甜品屋(長洲新興街3號)

呢度每人最低消費$15,仲要唔計糯米糍,所以唯有外賣,即使個場只有2枱客。$12蚊一粒芒果糯米糍,粉好薄芒果又甜又大舊,的確係好味過天然甜品少少,但如果相差$4我都係會揀返天然甜品,我仲記得以前假期嚟,芒果糯米糍(當時無咁貴)有時到夜晚已經賣晒,想食都無。

甘永泰魚蛋(長洲新興街106號地下)

 

呢間魚蛋$15串,絕對唔同出面啲麵粉魚蛋,係有魚味而且好彈牙,以前食要排隊,今次食竟然無乜人排。不過講到食魚蛋,全世界最好食一定係香港仔謝記山窿魚蛋,可惜已經結業。

時來食坊(長洲新興後街150號地下)

食完細魚蛋我就會食大魚蛋,大魚蛋其實無乜特別,純粹得個大字,$10串,不過個沙爹醬係幾好味,但係我覺得個魚蛋個口感差咗,好稔好假,感覺畀以前仲差。

康蘭餅店(長洲海傍道91號B地下)

拎個好意頭所以都買咗平安包食,$9一個,蓮蓉最好食,紅豆都OK,芝麻蓉唔好食,有紫薯味不過已經賣晒。

芝士帶子($20一件),極普通,芝士下面勁多菜,之前喺隔離嗰間食過芝士煙肉帶子($50兩件)好食啲,不過都係唔抵食,唔記得間嘢叫咩名,總之唔建議食。

除咗周圍食小食,我仲買咗魚春乾返屋企,$40一包,有4孖,可以蒸、焗、煎或燒都得,好重咸香味,啱晒送飯。千其唔好買佢幫你即燒嗰啲,要成$30一孖,極唔抵食。另外仲買咗黑芝麻花生糖,黑芝麻好香,同花生好夾,又唔會痴牙,$20蚊一包。墨魚絲,好食過魷魚絲,$25蚊一包,呢檔嘢得一架車仔所以無店名。另外要讚一讚長洲間OK,竟然有咁多款唔凍嘅嘢飲,仲有一個櫃係微涼嘢飲,細心。

總括嚟講,嚟到長洲其實都預咗食貴嘢,就當係一次半次嚟吸下新鮮空氣,放鬆下,享受下渡假feel。之前有喺度食過海鮮,唔係好貴,亦都唔係特別好食,夏天會食生果冰串同菠蘿冰。其實想試埋通記個沙爹麵,但係真係食唔落。大家喺長洲又有無咩好推介?

Photo credit: http://instarix.com/tag/%E6%BC%81%E6%A8%82

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *