做出氣袋都係人工包埋?

做出氣袋都係人工包埋?

姑娘:「身份證吖唔該。」
阿伯:「睇咗咁耐都仲要畀身份證?你做嘢做到攰得滯呀?咁都要問?癡線!」
姑娘:「伯伯,每次都要畀身份證我對㗎,咁你用唔用醫療券?」
阿伯:「上次咪用咗囉,你做到傻咗呀?又問!」

無論咩行業嘅打工仔都好,應該都試過無啦啦畀人鬧,至於點解咁多人鍾意無啦啦搵人嚟鬧?無得解㗎喎,我有壓力,你有壓力,未解決,未解決囉,或者佢睇你唔順眼,或者佢M到,或者佢又啱啱畀人鬧完,無論點都好,總之畀錢嗰個就係客,就算佢只係畀1蚊都好,佢都係你個客,佢鍾意點鬧你都得,就算佢無理取鬧都要硬食,何況如果嗰個唔係客,係你腦細,米飯班主?

做錯事畀腦細鬧好正常,之但係總有好多情況係無做錯而畀人鬧,例如腦細自己間竭性失憶症發作,明明係佢叫你go ahead個project,之後又怪你做咩擅自開始個project唔問佢意見先,明明個project無你份做佢又鬧你點解做得咁慢,當你話你無份做嘅時候佢就鬧你:「唔好咩都覺得唔關自己事!team work!」實情就係你篤爆佢鬧錯你佢覺得好無面所以點都要搵啲嘢鬧下你。又或者其實係你上司錯,但係你都要捱義氣食死貓,斷估你都唔會理直氣壯咁話:「唔關我事㗎,係阿姐教錯我咋。」

仲有一個情況都會奶嘢,就係腦細同腦細鬧交,當佢哋躁到爆之制又唔可以直接爆對方嘅時候佢哋就會喺其他同事身上發泄,順便顯一顯官威。你大可以放心,腦細係無時無刻都會諗到千萬個原因鬧你,而你只需要做嘅就係沉默,或者答「係/無問題/ 得/ 知道」,千其唔好笑,一笑就會令腦細潛藏炸彈引爆,因為佢會覺得你唔尊重佢,鬧你仲喺度嬉皮笑臉。

腦細Rex:「Brenda!今朝叫你做嗰份嘢點解仲未做好!咁無效率!3點前放喺我枱面!」
腦細Michael:「Bibi!點解你份嘢寫成咁?fresh grad都做得好過你!執返晒2點前畀我!」
腦細Rex:「Kate!你呢排成日都遲到,唔該你自己檢討下!」
腦細Michael:「May!你做乜著得咁casual!咁樣點見人?一啲都唔專業!」

當然有同事會覺得好不憤,覺得明明無做錯嘢做乜要鬧我,亦有同事同我一樣當佢哋喺度唱歌,無謂影響自己心情,最緊要準時放工。當然,久唔久一次硬食就話OK啫當人工包埋,但係如果太過份就真係要諗諗自己去向,我曾經遇過一個變態腦細,返十日工鬧足九日,第九日係佢有半日出咗去開會所以唔得閒鬧我,我做錯咗啲咩我真係唔知,我淨係知佢叫我跟A做,我跟咗A佢就鬧我點解唔跟B做,我跟咗B佢又鬧我點解唔跟C做,佢嘅惡行我已經寫咗落我本書度,篇名係《有啲工,真係唔係人做》,呢度唔再詳細講。

其實鬧人死好多細胞,皺紋都出晒嚟,畀你鬧嗰個又唔開心,然後佢又再搵另一個出氣,簡直係惡怛循環,如其成日鬧人,不如講多啲鼓勵說話仲好啦喂。

P.S. 小妹本書《我唔想你讚我,我淨係想加人工》而家喺誠品、商務、三聯、大眾、中華書局、天地圖書、開益書店同明報網上書店都有得賣㗎喇!

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *