《進擊》【第4回:雅典娜:戰爭女神 (II)】

《進擊》【第4回:雅典娜:戰爭女神 (II)】

2016年7月

「請問你其實參選嘅目標主要係咩?」主場新聞的記者坐在李振永身旁,誠懇地問他關於參選的事。
他想了一想,「我諗最緊要係自己對於香港嘅情意結啦,自己做咗咁多年電視節目監製,而且令自己成名嘅正正就係關心緊香港嘅節目《想知道的真相》,我覺得當我做唔到呢個節目啦,唯有用一個更直接嘅方式去愛護返自己屋企,同埋最希望可以改善到立法會內嘅問題,除左建制派不斷維護政府,而且泛民對於一啲重要事件又把唔到關,我覺得嗰次特權法通過唔到最令到我想參選。」
「點解嘅?你係咪講緊上次想追查保安局局長嗰次?」
振永開始哽咽,嘴唇亦開始顫抖地答:「嗯⋯⋯因為關我阿爸事⋯⋯」
振永一邊覆述數個月前發生的事,一邊眼泛淚光⋯⋯
「好,到今日最後一條問題啦,早個幾月咪發生DQ參選人事件,想問你有咩睇法?」
振永就抹抹淚㾗,就答:「當然係不公義啦,即係我覺得呢種手法對於參選人係好唔公平,如果用嚟對付講獨立嘅人,點解有其他候選人都講過相類似嘅話又唔會被DQ呢?而且我覺得DQ會陸續有嚟囉。」
經過長達一小時的訪問後,記者主動與振永握手並合照,她還拍了一拍他的肩膀說:「加油啊!我唔係新界東選民,但係聽完你嘅故事後,我都好希望你可以當選!」
振永微笑地說多謝,並點頭讓Shirley送她落樓。

「到時訪問出咗俾我睇下,睇下會唔會大部份都係我無講過嘅。」振永向Justin說。
「放心啦,主場應該唔會亂嚟嘅,佢係Facebook咁紅,唔怕俾人鬧咩。」
「我想問下我哋個Page情況點?」振永走向坐在電腦旁邊的Daniel。
「暫時唔錯,差唔多有1萬個Like啦,啲Post都OK嘅但係⋯⋯」Daniel猶豫地結尾。
「咩事?」
「有啲Post好奇怪,有好多簡體字comment囉你睇下⋯⋯」
振永碌了一碌滑鼠上的滾輪,在看有什麼特別的地方。他喃喃自語地讀出那些簡體字的留言「死黃屍們滾出中國,不要在香港搞破壞」、「所有港獨分子都應滾出中國」、「香港是中國的」、「李振永是垃圾是黃屍」⋯⋯
振永沒有被這些留言嚇倒,反而笑了一笑說:「呢啲肯定係五毛啦,你唔記得1年前做過關於佢地收錢洗comment嘅主題咩?」
Shirley搶過話柄說:「係囉,咁都俾佢嚇親,你真係細膽啦。」
振永叫Daniel看看其他參選人的Facebook有沒有這些五毛襲擊,看到梁麗芬的Facebook時,Daniel發現不少同名的戶口在其Facebook的帖子中有不少讚好,而且留言稱讚她能幹,能夠打擊獨立份子及黃絲。振永笑了一笑:「大後日辯論多樣野講啦,你幫我搵多啲呢單野嘅料啦。」

隔了兩天,主場為振永做的專訪已在Facebook刊登,當振永打開Facebook看時,就已經有數千個Like及心心。振永即時收到不同記者的電話邀請訪問,甚至有網媒及大學學生會邀請他出席公眾論壇。與Shirley編排了行程後,就準備午間在街頭拉票,然後晚上到無線電視城出席第一次辯論。

* * *

梁麗芬的秘書遞上手機給她看,說:「睇下主場嗰邊,出篇你對手嘅新聞又成功幫佢呃下班黃絲Like啦。」
梁麗芬掃了幾掃就遞回給秘書,不屑地說:「原來幾個月前佢就係嗰個係差館自殺阿伯嘅
仔,哈,竟然走出嚟同我爭,真係未驚過,睇死佢得嗰幾千票。啲留言幫我落多啲,等佢個Facebook多啲人轟炸下。」
秘書猶豫口窒地答:「呃⋯⋯但係啲留言俾好多人插緊喎,同埋好似無咩殺傷力咁⋯⋯」
梁麗芬想了幾想,就決定用新招說:「佢係咪今日去沙田拉票?」
「係啊,擺埋街站添啊。」
「我哋今日都擺,放係佢哋隔離,到時再霸多啲位遮住佢都好。」
「要申請咗先㗎喎⋯⋯」
「怕咩啊,到時叫主席幫我同處長溝通下就得啦,你第一日嚟做啊。」她嘴藐藐地向秘書講這番話。

* * *

正當振永與Shirley等人在沙田地鐵站對出街道在派紙巾及扇子時,突然一團穿著藍色風褸的人衝向他們的街站,在他們面前放置街站,並拉上橫額完全遮蓋振永的街站,梁麗芬隨即開始派扇子。Shirley走過去問他們是否已申請在這裡攞街站,卻被梁麗芬身邊的大媽義工驅趕,叫他們走開。Shirley感到不忿,準備想搬開他們的桌子時,被振永一手阻止:「算啦,橫掂我地就嚟派哂,早啲返去準備今晚嘅辯論啦唯有。」Shirley跟著振永收拾東西,只好走上車裡回到振永家。

到了晚上7點,正是第一次選舉辯論的時間。主持人宣布開始輪流名單發言介紹自己。
「香港經歷違法佔中後,社會嚴重撕裂,港獨思想不斷興起,我嘅目的係為咗反港獨反黃絲,請支持1號關偉新。」
「香港需要一個做實事、真正為市民服務的議員,我係2號李明儀,請支持2號。」
「加入議會係為咗向香港政府反映自決的必要,香港前途問題不能忽視,請支持3號黃君雅。」
「支持警察!支持香港政府!支持特首!支持4號葉娥玉!」
輪到振永,他深呼一口氣,就自信地說:「從監製出身的我,希望加入立法會為市民發聲,表達他們最急切的社會、政治、經濟需求,請支持5號李振永。」
下一名正是買留言及在下午阻擋振永擺街站的梁麗芬⋯⋯「香港需要繁榮穩定,我決定繼續進行議會工作係為咗撥亂反正,踢走所有亂港份子,還香港和諧生活,我係6號⋯⋯」還未說完,計時器已經響起。
「我好希望加入議會後可以踢走保皇黨,幫議會能做到真正嘅撥亂反正,我係7號張賢正。」
「我會繼續為工人發聲,爭取標準工時之餘,亦會幫議會剪布,停止影響工人生計,請支持8號鄭佩恩。」

經過首輪的簡單介紹後,就直接進入了自由辯論環節。經過一輪攻擊1號及4號候選人後,其他繼續針鋒相對,唯獨梁麗芬一直未有發言。振永見勢就想問梁麗芬一些事⋯⋯
「我想問7號候選人梁麗芬,喺咩時候多咗咁多來自內地同東南亞嘅Fans嘅?我見你Facebook都有唔少南亞裔同內地人留言撐你喎。」
「證明咗我嘅政績唔止有香港人欣賞,連海外都見到我嘅成就囉。」
「但係咁喎,你嘅Fans太熱血啦,佢地每日都會重覆佢地嘅留言係我嘅Facebook度,我仲見過有個帳戶將讚嘅留言錯誤留咗係我嗰度添,呢啲會唔會係民聯黨人才不濟造成呢?」
「主持,我認為李振永係度講啲無證無據嘅事,我要求佢停止發言。」
振永舉著手說:「等等先,我同事就幫我做過下搜集資料,原來淘寶網有買Like買留言嘅服務,跟住求其搵左間問,點知發現佢有幫過你手喎,仲要俾埋你地對話嘅紀錄添。估唔到淘寶網嘅店主會咁誠實,而且連議員嘅私隱都爆埋出嚟,平時問係咪A貨都唔會咁誠實,唔知梁麗芬議員有無就呢樣野申報選舉嘅開支呢?」
梁麗芬眼神變得恍惚,而且口窒窒不能說出一粒字,全場即時有掌聲及噓聲,有人大叫「梁麗芬收皮!」其後的自由辯論中,她一句話都沒說,面對其他人的質詢,她亦只能敷衍了事。
完了整場辯論後,梁麗芬低著頭,匆匆忙忙與團隊去停車場,上到車內,她深嘆一口氣,「你哋點做野㗎,你哋無叫淘寶嗰個保密嘅咩?而家俾條粉腸搞到我冇哂面啦。」
秘書連忙說對不起之餘,亦繼續建議她下步可做什麼。「唔緊要嘅,辯論有幾多人會睇啊,班老人家唔會知,睇左都唔記得嘅,搞多幾場送月餅食蛇宴就得啦。」
梁麗芬藐一藐其秘書說:「呢啲野搞到厭啦,你記得搞掂好班老人家,車佢地成班人投票,印埋個number係佢地手度。不過今日真係睇呢條李咩永唔順眼,咁都有位俾佢入。」
秘書連忙搶過話柄:「不如,搵人做下佢世界呢。」
梁麗芬想了一想,笑了一笑就說:「呢兩日同我搞掂佢。」

兩日後,振永與Shirley他們出席完城市論壇後,就準備回振永家繼續整理街站的擺設,回到家時,發覺整個家門被淋了紅漆,還有封有刀片和冥鈔的信:「你一選到就一定做你世界。今次只係屋企門口血淋淋,下次係你個人。」

(待續)

啱睇就Like埋我地個Facebook專頁
香港土生土長的人,就讀於嶺南大學文化研究系。關心社會,熱衷於研究各樣文化及現象,熱愛研究韓國文化。

Leave a Comment

Your email address will not be published. Required fields are marked *