「遠離負能量的人,請不要來帶走我的正能量!」 係一把刀,隨時可以殺死你

「遠離負能量的人,請不要來帶走我的正能量!」 係一把刀,隨時可以殺死你

幾年前,我星期一至星期七開盡 Turbo 咁返工,初初好開心啦(出糧嗰陣),以為一切壓力可以隨住份糧慢慢分解出去,但過左一段時間,發覺嗰種精神壓力係一點一點咁累積落嚟,原來實情係冇排放到,就好似 D 宿便積下積下喺你條腸入面,塞住左咁樣。

我知道我嘅壓力來源於對自己要求太高,所以我好鍾意《Black Swan》呢套戲,嗰種好想好想做好但自己能力未夠又唔知點樣做好嘅心情,中肯到一個點。

壓力已經累積成一個炸彈,隨時可以爆發,就只差一條導火線……

後來導火線出現,一發不可收拾,原本已經徘徊喺懸崖邊緣嘅我,瞬間被推落深淵。

嗰個深淵係無止盡咁深,嗰種黑暗係伸手不見五指嗰種黑。

我開始覺得呼吸唔到,每呼吸一下都要用力扯晒蝦咁去索先稍為覺得條氣順少少。

夜晚一熄燈,就有隻鬼走入我個腦入面,不停迫我諗好多好多唔開心嘅野,務求搞到我眼淚流干為止……

我當時唔止一次喺心裡面絕望咁呼喊:

「停啦好無?!我唔想再諗喇……我真係好攰呀…求你比我瞓一陣啦…求你……」

你明唔明嗰種感覺?
你知唔知完全控制唔到自己個腦嘅感覺,係幾咁恐怖?!

如果有人話比我知,我腦入面有個制,伸手入去㩒停,就可以唔洗再諗野……

我會毫不猶豫咁去做,不惜一切代價。

但我唔可以。
無人幫到我。
黑洞入面只有我一個人。

為左分散下自己注意力,唯有上Facebook ,但越睇就越唔掂,往往自行對號入坐,硬係覺得朋友們發嘅status 係沖著我而發、share嘅post係對我有所暗示。

「一班人去食晚飯……每日都要開心過Yeah~」
你睇下……人地幾多朋友幾受歡迎,你自己呢?

「保持正能量思想,必勝12條法則」朋友開心share嘅一個post。
人地同你暗示呀…話你負能量呀廢人!

「微笑係最靚嘅化妝品」
話你呀…一日到黑西口西臉死老豆咁,幾樣衰,人地無必要睇你面色架……西人!

於是,有把聲音同我講:
「你睇下你幾無用幾唔受歡迎,個個都話緊你呀!」
「你自己攞嚟,抵你死啦…」
「點解你仲喺度?點解你唔消失?」

喺我耳邊,無限loop…

無錯,我點解唔消失?
我存在喺度有咩價值?

本來已經無盡自責嘅我,就更加覺得自己廢。

最要命嘅一次,係睇到一篇文章,標題係:
「遠離負能量的人,請不要來帶走我的正能量!」

一睇,不得了!
剩係睇標題,已經無力再睇任何野,眼淚不止。

唔知有幾多人明白,一個喺黑暗深淵入面嘅人,其實係好想有人明白我嘅感受,我好希望喺洞入面唔係得我一個,更加唔好掉條繩落去企圖救我出去,因為我無力氣去面對我自己,出面好光,我好驚,我實在無勇氣出去,唔好迫我。

而嗰D所謂「正能量」,我只會覺得我同你地個世界更加遠,更加被你地唾棄。

喺黑暗中嘅你,希望你知道,無論你喺幾深嘅深淵,都唔會只得你一個。

起碼我相信。

 

Photo: Animal Jam Clans Wiki – Wikia

文: A312

啱睇就Like埋我地個Facebook專頁

歡迎各位讀者踴躍投稿,來稿請電郵至 info@menjap.com

Leave a Comment

Your email address will not be published. Required fields are marked *