【窮人恩物】邊個話中環無平嘢食?(二)

【窮人恩物】邊個話中環無平嘢食?(二)

其實中環有好多地方兩點已經開始有下午茶食,所以如果你公司係可以兩點先食lunch,咁你就有福喇,起碼多啲選擇又唔使同人迫,以下地方喺中環嚟講都算平,而且某啲餐廳個環境會比起上一篇《邊個話中環無平嘢食?(一)》介紹嘅好少少。

筷子記 (中環威靈頓街85-89號群英商業大廈A1號舖)

上一篇小妹介紹大家去食粥,但係就嚟夏天,仲食粥想熱死人咩,所以今次我就推介大家去食撈麵。30蚊有兩個餸包埋嘢飲,撈麵足足有2個麵餅,一定夠飽,通常我會揀沙茶醬。雞翼係必食,超入味又稔永無失準,有時想健康啲我就會揀生菜,你知啦lunch要食菜係一件好難嘅事。飲品就會揀美祿或者杏霜,因為出面好少有得揀。

新興美食 (中環昭隆街9號B舖地下)

呢度主要食炒粉麵飯,雖然都有香茅豬扒湯河嗰啲,但比較少人叫。呢度炒嘢夠鑊氣,而且份量大,通常三個女仔叫兩個炒粉麵已經飽晒,一盒大概三十幾蚊。我最鍾意食吉列豬扒飯,粉薄,豬扒大大塊又唔油膩。

陶館 (中環機利文新街4號地舖)

炸雞髀沙律($34)係必食,即叫即炸所以要等耐少少,可以提佢唔好炸太燶,沙律超大份,可以免費轉飲紅荳冰,所以食呢個餐都夠飽,另外芝士熱狗都好食。

Yummy (中環昭隆街10號地下)

每日都有幾款精選特價飯,大大碗只係$33,魚香茄子飯、免治牛肉飯同咖哩飯雞球飯都幾好食,呢度仲有得食車仔麵,不過如果想食車仔麵我通常都揀筷子記。

瑞士咖啡室 (中環利源西街12號地下)

呢度嘅公仔麵係用出前一丁,沙爹牛肉夠濃味,雙拼揀埋豬柳漢堡都係$34,有埋嘢飲,熱柚子蜜唔使加錢,不過呢間嘢曾幾何時好似係試過有單食物中毒,睇你夠唔夠膽去喇。

太興 (中環租庇利街12-13號萬安商業大廈地下A號舖)

其實唔想幫襯連鎖店,但係有時都真係想舒舒服服咁食個lunch,呢度勝在冷氣夠大又有卡位。我通常食餐蛋麵/ 雞翼撈麵/ 牛丸米,之前有個酸辣魚腐米線都好好味可惜而家無咗,最好係飲柚子蜜唔使加錢,大概一餐$40。

魚米家魚湯米線大王 (中環威靈頓街98-102號翡翠中心2樓)

呢度個魚湯湯底係幾好味,不過其實都係普通米線,可以揀牛腩、魚皮餃等,點解都要推介佢?因為係呢度可以加$5多碟菜食,感覺健康少少。

大家樂 (中環皇后大道中88號勵精中心1樓)

下午茶例牌都係食細燒飯或者燒味雙拼米,記住同師傅講叉燒要半肥瘦,最近出嘅碎蛋芝士多士都唔錯。lunch其實有$33蚊特價飯,不過要早啲去,因為好快賣晒,而且呢度又係有得加幾蚊要個菜,不過味道就麻麻哋。

日日食呢啲太頹廢?咁我勸你都係返去求求母親大人畀你帶飯喇,好味溫馨又健康。

圖片:網上來源
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *