【糧尾救星】邊個話中環無平嘢食?(一)

【糧尾救星】邊個話中環無平嘢食?(一)

雖然話就話喺中環返工,但係你估個個都係 iBanker 秒秒鐘幾百萬上落咩,都有好多人其實只係小薯仔一個,食物鏈最低層,即係小妹我。雖則帶飯係最慳錢,但係久唔久都想同同事出去吹水講下八卦嘢,如果一星期出足五日真係分分鐘會食到窮。老老實實我就寧願平日同同事慳啲,慳埋啲錢放假去食好西喇,以下係小妹畀大家嘅平食推介(非廣告)。

福滿源食店外賣中心 (中環鐵行里 10 號地下)
呢度嘅粥底好綿,而且好足料,一碗皮蛋艇仔粥只係 $17,大半碗都係料,女仔食一碗已經飽,男仔唔夠飽加埋條油炸鬼都係 $26。除咗粥,仲有蒸飯食。唔好嘅係呢度係露天,如果落雨/ 附近有人食煙就好煩,而且位唔多,得幾張枱仔架咋。

忠記粥品 (中環機利文新街 32-34 號A舖)
呢間嘅粥都係又綿又足料,不過會貴啲($20),因為係室內,雖然啲位都係迫要同人搭枱,如果想食牛脷酥($8)可以揀呢間,另外仲有炒麵、腸粉同糉可以揀,唔使成日都食粥熱到死。

南記粉麵 (中環士丹利街 66-72 號佳德商業大廈地下及 1 樓全層)
呢間好出名應該唔使我多講,最鍾意食招牌河($27),有必食春卷同普通嘅魚蛋,其實豬頸肉酸辣米線仲好食,不過就貴好多($37)。雖然地方大,坐得舒服,但係 lunch hour 去真係超級多人,等位都有排你等。

三多麵食 (中環砵典乍街 30 號地下)
$33 一碗鮮蝦雲吞麵,唔係特別平但係雲吞超大粒!佢嘅菜肉雲吞同鯪魚肉都係超大粒!第一次食真係嚇親,喺度食完粉麵仲可以去 759 掃零食,好近。

權記雲吞麵 (中環卑利街 2 號地下)
要平除咗食粥就係食粉麵,呢間超平,$20 一碗雲吞河,食物質素普普通通,雲吞啲蝦太爽口有啲假,墨丸唔錯,通常會我加辣椒油同魚露令碗粉好味啲。

福祿壽健康素食 (中環鐵行里 8 號地下)
中環僅有嘅平價素食店,每日有成十幾款畀你揀,可以上佢 Facebook 睇當日有咩食,好方便,兩餸碟頭飯都只係 $31,如果想飲埋湯就 $34,仲可以揀食炒麵或炒米粉,自己任裝任食,大食之人抵到爛。梅子汁素鴨或椒鹽紫菜素鵝都好好食,酸齋同南乳炆素鴨就太重口味喇。

昭隆美食 (中環昭隆街 21-23 號地下)
成日食粉麵都會厭,不妨去呢間食吓飯。大件夾抵食,係室內,有冷氣涼又有卡位坐,必食嘅係黑椒汁雞扒飯($3X),超多汁,辣辣哋好惹味,仲要有兩大塊雞扒,女仔食唔晒仲可以開心 share。

革新會食堂 (中環租庇利街 10 號富興大廈 3 字樓 301 室)
呢間係讀者介紹,兩餸飯都只係 $35,有肉餅、豉椒雞球等家常菜揀,仲要白飯任添,不過我暫時未有機會去試食。

一分錢一分貨,以上店舖嘅環境一定係差啲架喇,你唔係諗住喺中環廿幾三十蚊餐仲有靚景睇掛?不過如果你公司係可以兩點先食 lunch 嘅話我就恭喜你喇,你將會有更多更好嘅選擇,下集再講。

P.S. 食粉麵仲有沾仔記同富榮記,不過我就未試過。另外唔怕熱氣嘅話 KFC 有時會出二人餐 coupon($58),會抵食啲,M記兒童餐或者 $23 餐都係窮食之選。如果大家有咩心水推介都可以話我知,平又好貴又好乜都得。

 

facebook

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *