【飛雲,這些機會不是你的】爸媽去了旅行,女友卻不肯來我家過夜

【飛雲,這些機會不是你的】爸媽去了旅行,女友卻不肯來我家過夜

Mike:「星期六爸爸媽咪去旅行呀,你過唔過嚟呀?」
Brenda:「好呀,可以玩煮飯仔呀又慳錢,不過我唔過夜喇。」
Mike:「吓,點解呀?」
Brenda:「我第二朝要學跳舞呀,由你屋企去好遠。」
Mike:「唔係吖,都係多半個鐘咋嘛。」
Brenda:「咁又要早啲起身呢。」
Mike:「你平時自然醒都八點幾㗎喎。」
Brenda:「唔係呀,你知啦你有鼻寒聲,我夜晚瞓得唔好,第二朝好攰㗎。」
Mike:「之前我哋都係咁一齊瞓架喎。」
Brenda:「總之唔過夜啦。」
Mike:「係咪有咩事呀?」
Brenda:「唔係呀,無事。」
Mike:「有事唔怕講喎。」
Brenda:「真係無事呀。」
Mike:「你都唔識講大話,講,咩事。」
Brenda:「er……um……因為……因為我驚你屋企個小強家庭呀!」

以上設計對白當笑話聽完就算,我只係想講小強真係呢個世界上最恐怖嘅生物,個樣超核突,身手又敏捷,行動勁快,如果識飛就更加恐怖。我都明白幾乾淨嘅屋企都會有小強,好耐之前我屋企都有隻超級大嘅,阿 Mike 屋企都有一大一細,我阿媽仲話通常見到一隻,就證明屋企已經有一家大細,真係好得人驚呀大佬!同埋我每次夜返總會有一兩隻喺樓下等我門,真係一步一驚心,好似玩地雷陣咁。最慘係你見到一隻嘅時候嚇到向前衝,點知原來衝緊去另一隻度,差啲剎都剎唔切制。

有次返屋企,前面有對母女,個細路女突然走晒音咁尖叫:「呀!喺我對鞋入面呀!」好慘,如果係我可能嚇到喊,真係諗起都打冷震。話說琴晚阿 Mike 送我返屋企,又撞到小強,我哋兩個喺度左避右避,後面有個男人話:「前面做咩?唓,小強。」跟住阿 Mike 細細聲同我講:「人哋可能以為我男人老狗都驚小強,一腳踩死佢咪得,但其實我係知道我踩死咗你仲驚,同埋勁多細菌我先唔會踩。」佢講得無錯,話說喺好耐之前,我又自己一個喺度避小強,然後有個男人懶有型咁走過嚟一嘢踩死咗佢,我即時講咗句粗口。

唉,小強生命力真係好強,我諗就算世界末日所有人死晒小強都未死。

 

facebook

啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *