二人世界,記得收埋電話。

二人世界,記得收埋電話。

戲院教你睇戲要熄咗電話(熄條毛咩,最多咪Set震機),計我話當你拍拖嗰陣部電話都係少用為妙。

出街食飯嗰陣不妨望下隔離左右,可能好多人一對對咁嚟食飯,但一坐低就各有各玩電話,難聽啲講句兩條友同搭枱食飯冇分別,甚至對面跟人走咗都唔知。 Come On,二人世界嘅時間你應該好好珍惜,當最重要嗰個都坐咗喺你對面,你仲望住電話想搵邊個?可能你好多WhatsApp要覆、可能你係Instagram 紅人、可能你Facebook好多嘢睇,但一切都唔應該影響你同佢相處嘅時光。冇人希望比人忽視,特別係自己鐘意嘅人,如果一餐飯嘅時間你都唔想理佢,你 地嘅關係會唔會已經到咗接近分開嘅地步?唔好以為我講得誇張,其實好多人真係咁諗。

冇錯,而家電話真係好重要,如果我唔記得帶電話出街我寧願返工遲到都會返屋企拎。人靠電話連繫朋友、睇新聞、Check E-mail、甚至係用嚟買杯咖啡,基本上生活樣嘢都要靠電話解決。有專家話人太依靠電話唔係一件好事,但喺香港你好難唔靠身上面部智能電話做人。只不過 電話再先進都好,你同佢一齊嗰種面對面嘅親密,十指緊扣嘅溫暖都係電話比唔到你嘅功能。可能WhatsApp真係方便你同佢返工時溝通唔洗轉台Send SMS,仲可以第一時間影埋相比佢睇,但依個都係你地兩個相隔兩地嗰陣先要靠電話連繫。當最愛已經喺身邊,當佢需要嘅係聽你親口講今日發生嘅事而唔係靠 Facebook先知,電話已經失去佢嘅作用。你要做嘅只有將電話放埋一邊,好好望住佢雙眼,幫佢眼前杯咖啡落奶落糖,然後親口同佢講一句「好掛住你」。

到底科技係幫我地拉遠定拉近兩個人之間嘅距離?其實決定嘅人係你。可能電話有好多你同佢嘅合照,可能佢就係你Screen Lock嘅相,但當你放低電話,你就會發現佢近在咫尺。

仲玩電話?不了,我比較想拖住你隻手。

一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:網絡取材

啱睇就Like埋我地個Facebook專頁
你有多久沒去找自己的理想?搏殺一天,回到家,倒頭就睡。無言,只因生存太累。談理想?妄想;毛言仍言,只因理想,本就是「理應去想」

Leave a Comment

Your email address will not be published. Required fields are marked *