喂,唔係個個女人靠姣就上到位架!

喂,唔係個個女人靠姣就上到位架!

一向對外宣稱只係鍾意鬼佬嘅 90 後同事 Bibi 最近可能食錯藥,係男人佢都姣,外賣仔、送貸仔、司機大哥、廚房佬、維修佬、男同事,總之一個都唔放過。至於點姣?離不開都係嗲聲嗲氣,間唔中有少少身體接觸咁囉,我次次行過見到都會毛管戙。姣成咁有咩著數?有人請食嘢,送下小禮物咁囉,擺到成枱都係。其實佢姣佢嘅事,我同一眾女同事大可以唔理佢,衰就衰在佢識一樣中國國粹 – 變臉。

話說有次我等緊𨋢,佢喺格𨋢入面同個阿叔傾到嘻嘻哈哈咁,然後一出𨋢見到我,即時西面仲「摺」咗我一聲,再用好不屑嘅眼神望住我,what the hell?我做錯咗啲咩?唔止我,佢對所有女同事都係西面,阿姐都無面畀,所以大家都好憎佢。有個新嘅男同事仲傻下傻下話:「可能佢性格本身係咁呢,對個個都咁 nice。」如果佢一視同仁,男女都姣嘅,fine,但唔係囉,不過咁,其實佢都帶咗好多歡樂比我哋嘅,話說有一日,佢竟然勇敢到當住阿姐面對腦細出手。

「Rex,我好凍凍呀,你有無外套可以借比我?西裝褸我都唔介意㗎。」慘慘豬 Bibi 說,其實佢著低胸小背心加短裙,凍都好正常。
「有,不過無帶,哈哈。」腦細 Rex 笑說。
「我有喎!借畀你吖,凍就唔好再著短裙仔返工喇,知嗎?」阿姐關心地說。

呢件事即日已經傳到成個公司都知,大家都笑到傻咗。姣腦細唔係問題,但可唔可以姣得醒少少同有返少少自知之名呢?姣都要睇時機架嘛,大庭廣眾姣腦細,腦細想受都唔得啦,仲要阿姐都喺度,跟本係死梗。而且你仲想姣件老西返嚟著?你估而家玩龍袍加身咩,唔好睇咁多膠劇啦,睇到上晒腦。你唔係諗住你一個小薯仔可以著住腦細件老西,等其他人見到,以為你哋有非比尋常嘅關係,然後就可以作威作福掛?你侮辱自己就算啦,唔好當腦細傻先得㗎。

雖然話十八無醜婦,但後生都唔一定等如索,你返去照下鏡先啦,咁嘅款就諗住釣金龜?畀啲誠意執埶佢先啦好嗎?除咗西面,佢仲係超級無敵懶,做嘢無效率得個拖字,態度差又無交帶,份人粗心大意,做乜錯乜,執手尾都有排你執,成日講大話,有十萬個藉口死都唔認錯,淨係識推落其他人度。點解我咁憎佢?成篇嘢都咁 mean?因為阿姐話佢做嘢實在太差,唔敢交嘢畀佢做,唯有交晒畀我……

P.S. 如果你仲未知邊個係 Bibi,歡迎睇返呢篇《其實我真心唔明鬼佬有乜好》

 

facebook

啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *