喺香港,賤骨頭先會話要追夢。

喺香港,賤骨頭先會話要追夢。

香港工時高係人都知,有幾多人放工已經連太陽都見唔到,附近得間七仔同24老麥係開緊。搏殺咗一日,朋友聚會一係冇時間去,一係冇精神出,寧願盡快返屋企沖個涼上下網就瞓覺。返到屋企仲要用腦,甚至放工屋企都唔返去繼續做自己嘢?咪搞啦,攰架,咁辛苦攞嚟賤做乜?

偏偏喺最功利嘅香港就真係有班咁嘅賤骨頭:唔怕辛苦、唔理幾攰、由得人笑,日復日年復年咁做自己真心想做嘅事。

返到屋企明明已經眼瞓到可以即刻瞓著,但仲有人會打開電腦默默打字,造就連登一篇篇你追Live追到喊哂口嘅小說,打開Facebook就見到一篇篇唔同題材嘅文章。有幾多篇你返工搭車睇嚟消磨時間嘅文喺作者用凌晨先有嘅時間寫出嚟?我可以答你單單係經我手嘅都有唔少;當你已經瞓喺張床,唔同嘅工廠大廈有幾多隊Band仲喺度夾歌寫歌?有幾多人不惜自資出碟,有幾多人唔介意收嗰少少車馬費就拎住一箱二箱嘢去酒吧為咗嗰十分八分鐘嘅出場時間?莫講話搵錢,場租個個月都要比,點解搵得唔多都仲要咁嚟折磨自己?因為比人欣賞到自己作品,嗰下滿足感真係好美好。

夢想係無限多,因為每個人都可以有唔同嘅夢。要做個本土設計師、要自己設計西裝、要將手工啤發揚光大、要自己開鋪頭賣鐘意嘅嘢、要做到人人話正嘅生日蛋糕⋯⋯夢想未必係最幫到你搵錢,甚至要你洗錢去養住嘅嘢,但佢會令你每日嘅生活有返小小希望,有返少少動力。我唔怕挨眼瞓將靈感化成文字,我唔怕咁耐以嚟靠寫嘢搵嘅錢去個日本都未必得,我只係怕有一日我會成為嗰個返到屋企就話攰唔想做嘢嘅香港人。喺大人眼中可能依啲叫唔成熟,唔識諗,但如果冇夢想先係大人嘅人生,咁由得我幼稚落去啦。

回報?想就當然想有啦,但係就算冇都唔會影響你對夢想嘅熱愛。而且對我嚟講每次有人留言話有用,Inbox話我寫嘅幫到佢,我就已經覺得一切嘅付出都係值得。

有夢就追,You’re Not Alone。

一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:網絡取材

啱睇就Like埋我地個Facebook專頁
你有多久沒去找自己的理想?搏殺一天,回到家,倒頭就睡。無言,只因生存太累。談理想?妄想;毛言仍言,只因理想,本就是「理應去想」

Leave a Comment

Your email address will not be published. Required fields are marked *