用舊屎嘅方式去吸引年輕人,永遠都唔會 work 囉

用舊屎嘅方式去吸引年輕人,永遠都唔會 work 囉

「最近公司希望吸納多啲年輕嘅客人,而家啲後生最鍾意睇咩?」老闆 Michael說。

「而家最 hit 應該係 100毛,可以搵佢哋度橋拍條片,普遍點撃率都算高。」我說。

「佢哋條片有黎明,實多人睇架,唔代表佢哋勁囉。」80 後同事 Kate 說。

「係咪好無聊嗰個咩毛記電視?好無謂囉,都唔知做乜嘅成班人都。」70 後同事 May 說。

「其實佢哋唔係條條片都用明星,有啲用返自己嘅主播都 OK。」我說。

「係咩我無睇過,其實我覺得喺報紙賣廣告仲好,或者出返本特刊介紹我哋。」Kate 說。

「OK 喎,講下我哋公司嘅歷史同有咩特色,加埋啲相應該都好吸引!」May 說。

最後個會當然係無結果,又係喺度嘥時間。一班三、四十歲嘅人永遠都唔會明白而家時下年輕人點諗,當佢哋要圍埋諗啲嘢去吸引後生嗰班,但又拒絕去了解後生仔女嘅諗法,佢哋就會用返舊屎果套思考模式套落去,然後自我安慰覺得一定掂,簡直係倒錢落海。我已經算係公司最後生嗰個,勉強叫做最貼近目標客群,但係我講親嘅橋佢哋都 ban,覺得唔啱聽,唔 work。Ban 橋唔緊要,亦都好正常,大家一齊 brain storm 吓,但可唔可以唔好又拎返舊屎啲橋出嚟話一定掂?
你諗下,十年前同而家比,仲有幾多人會買報紙睇?免費報紙還好,會用錢買報紙睇真係少之又少,後生嗰班九成九都係上網睇。特刊更加唔使講,免費派畀我我都唔想睇,你公司歷史關我叉事咩,一啲都唔 interesting,仲要通常每個董事都有一版畀佢發表偉論,其實呢份嘢純粹係比啲大粒自娛,對吸引後生仔女真係零作用。至於 100毛,佢未必係最好,但你睇都未睇過就話唔 work,根本都無去了解過,又有咩資格批評?

又以 Facebook 為例,成日問我點解個 Fan page 啲 like 數無乜點增加,大佬呀你唔肯做 campaign、唔畀任何 discount、唔 boost feed、唔賣廣告、甚至連 feed 都唔多條,梗係唔會無啦啦多咗人 like 啦,有我仲驚。仲有,你唔係覺得一個月先出得一個 feed,Fan page like 都可以暴升掛?我自己呢個 page 成日出 feed 都唔見得有升啦(順便呻一呻 XD)。

其實我有建議出多啲 feed,唔一定要長篇大論,最重要係內容得意有趣,或者有張靚靚相,即使簡單如「Happy Friday!」都可以當一條 feed,起碼 keep 住有曝光率,但係當然又被 ban。「吓?寫一句嘢都要出 feed?」、「為咩要出呢個 feed?有咩用?」每次出 feed 都一定要有好 strong 嘅原因,內容一定要好豐富(即係多字),其實而家無人鍾意睇咁多字架喇,淨係鐘意睇相同 video。仲要寫到咁悶,講歷史講藝術,鬼有人睇咩?有時寫完仲要畀唔同人改十九幾萬次,改完出得嚟都已經 out-dated,真係唔出好過出,出完都畀人笑。

不過講到尾,打工仔又有乜 power啫?做又 36,唔做又 36,咁上心想搞好個 brand 做乜啫?又唔係有 bonus 分,老闆叫你做乜咪做乜囉,不過到時唔 work 唔好賴我,亦都唔好話我唔 creative、無橋,係你哋從來無 buy 過啫,完。

 

facebook

啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *