臨放工先畀嘢人做真係好乞人憎!

臨放工先畀嘢人做真係好乞人憎!

「有無嘢要幫手?」我說,三點正,仲有三粒鐘就放工。
「唔使喇,我忙到出煙,唔得閒理你,你自己做嘢啦。」阿姐說。

三個鐘之後。。。

「你幫手寫呢份新聞稿,好趕,聽朝九點要!」阿姐說。
「哦,好。」我說。今晚又唔知幾點先收得工。

平時腦細久唔久都會send email出嚟話畀大家知最近有啲咩project要跟,deadline係幾時,然後正常阿姐就會分配工作畀唔同team嘅同事。但係阿姐就係唔分出嚟,你以為佢自己做晒?少年你真係太天真太傻喇,佢只係以忙為理由,話唔得閒將啲工作分出嚟住,到真係deadline嚟喇,你又就嚟夠鐘放工喇,佢就會掉畀你,然後叫你即刻趕起佢。最慘係做完都未走得,因為要等阿姐睇埋改埋先,但係阿姐忙到出煙,係唔會即刻幫你睇,你可以做嘅就只有呆等。甚至有時你做完一樣,歡天喜地諗住走嘅時間佢又會再掉第二樣畀你做,總之就係搞到全世界一齊無得收工。

咁萬一約咗人食飯或者應承咗返屋企食飯咁點算?無點算㗎叫人邊食邊等囉、放飛機囉、叫屋企人留飯囉,但係有時屋企人會話唔肚餓,等埋你先食,咁就大劑喇,成家人一齊九點先食飯,你過唔過意得去?有見及此,我通常就直接話唔返屋企食飯,唔約朋友,費事累己累人。有時阿姐都會叫大家食個飯先,但係大部分人都會話唔使,因為大家都想盡快離開呢個地獄,寧願捱住肚餓先,七點捱到、八點捱到,咁九點、十點、十一點呢?其實咁樣真係好易捱壞,我都係嗰段黑暗時期搞到開始有胃痛,加上我肚餓係會躁底,所以後期我點都會食少少嘢先。

其實我真係好唔明白,工作一早就派咗落嚟,做唔晒咪分畀下面啲細囉,正所謂三個臭皮匠,勝過一個諸葛亮,雖然我哋呢啲小薯仔一定無阿姐你做得咁叻,分分鐘要你執手尾,但係既然你到最後都係做唔切,又係逼住要隊返過嚟畀我哋做,咁不如你一早畀我哋慢慢砌仲好啦,你知啦我哋本身能力已經無你咁高,仲要過咗office hour更加電力急降,體力無乜,腦又實埋,咁嘅狀況嘔出嚟嘅嘢一定唔會高質得去邊,你係都要個個陪你一齊收唔到工,只會令到大家越來越唔妥你,離開你。

我奴性唔算高,而且我都好愛惜自己,所以一早已經轉咗工,無再留喺呢個地獄。久唔久都會聽到有人遇到呢類變態阿姐,畀佢精神虐待,成日要白等,浪費時間,加班加到天昏地暗。可惜除咗你自己,其實真係無人可以救到你。一係反抗阿姐,一係轉工,如果兩樣都做唔到,就只有接受,就係咁簡單。

image : keepcalm-o-matic.co.uk
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *