《進擊》【第 2 回:無情都市】

《進擊》【第 2 回:無情都市】

Chris 知道振永的脾氣又來了,不厭其煩地說:「唉,你出嚟同我傾啦,我本身都唔想講點解啦⋯⋯」

Chris 搭著振永的肩膀走出會議室,振永不斷試圖縮開但不成功,去到 Chris 的辦公室了,振永連坐都未坐,就問:「點解唔做得新界東北?俾個合理解釋我。」

「你坐低先,慢慢傾好無?唔好咁勞氣。」

「你知唔知我搵啲村民、搵 source 等等都搞咗成一個禮拜,你而家咁講,我呢個星期可以播咩?」

「我明我明,你估我想咩,多得你地,我地個台先至多啲廣告同收視,仲要拉低無線啲收視添。但係⋯⋯呢個理由,令我唔想都要咁做。」

「咁係咩啊?」

「呢個係上頭 order 嚟嘅,因為佢哋收到個電話,然後就叫我同你咁講啦。」

辦公室內靜了五秒,振永不聲不吭,不知道可回答什麼⋯⋯他嘗試吐一些字出來⋯⋯

「呢⋯⋯呢⋯⋯個都係原因嚟咩?嘩,估唔到電視成日做嘅情節發生喺我身上喎,咁而家因為上頭受到所謂嘅壓力,就要我開天窗?」

「唉,我都唔知啊,但係事到如今都冇辦法啦,幫幫手啦⋯⋯」

「唔理得咁多,柳一江已經係樓下準備緊,我哋啲資料同片都做哂,奈我唔何嘅,你都識講啦,多得我地先至有收視同廣告⋯⋯」話口未完,Chris 就突然大聲呼喝,發怒地說:「_,夠啦你!你唔好以為幫到收視就可以咁囂,我唔想因為你呢條_ _令我無得撈,而且上面叫你停就停啦,做人唔好咁_過份喎。我都忍咗你好_耐,唔好睇到自己咁_大啦,呢個節目無咗你,都可以照舊收視勁爆。你想做就照去囉,不過我可以話定你聽,你照拍嘅,呢個禮拜我就 cut_咗你個節目,求其搵齣戲攝期都仲得,後果自負啦吓。」他說完就走了出去,「砰」一聲關了門。

振永氣沖沖回到辦公室,一拳打在牆上,大叫一聲「_!」杰哥問發生了什麼事,他如實答了後,全部人均你眼望我眼,不知如何是好。思索了數分鐘後,振永突然說了一句:「我哋照去馬。無理由做咗咁多野,益哂垃圾筒嘅。」杰哥、Justin 等點頭和應,其後全夥人直接走去了攝影棚,開始了拍攝⋯⋯

拍攝完成後,回到辦公室,整班人見到他們的會議室貼了張告示⋯⋯「今期《想知道的真相》將停播兩星期,直至另行通知。」

Shirley:「似乎今次真喺嚟真,但係無諗過呢啲野連我地台都有喎⋯⋯」

Justin:「咁而家點好⋯⋯擺明俾人做陰謀喎而家⋯⋯」

其他同事 Daniel 及 Miki 就顯得有點膽怯,就怯懦地問會否因此而被炒魷魚,而振永一直沒有出聲,他知道這次 Chris 是來真的,但振永的性格這麼倔強,他一直思考如何把這期節目照播出街⋯⋯

隔了三四天,到了星期六晚9點半,亦即是《想知道的真相》的電視播出時間,突然他們的電視台 NiuTV 的 Facebook 專頁上出現了直播,正是新界東北這一期,原來振永與其他同事計劃好,拜託了技術部同事幫他們放上專頁直播,剪片亦是在振永家剪。他們在茶餐廳一起吃晚飯時,見到大部份食客都拿著電話,Justin 偷𣈴一下,正是他們的節目。而 Shirley 拿出電話看看,「你哋睇吓,直播收看人數有 15 萬人啦!」振永笑了一笑:「話知佢啦,總之出到街,就心都安樂啲,一來為咗自己老豆啦,二來唔想自己個台變咗隔離台咁,有黑勢力?做戲咩。」

而在振永搭的士回家時,突然收到爸爸的電話⋯⋯

「喂?老豆?」

「過嚟救我啊仔,我間屋被部車剷⋯⋯剷平咗啊⋯⋯」

「吓?發生咩事究竟?」

「快啲過嚟啦,啲⋯⋯啲差佬完全唔⋯⋯做嘢,我過去想阻止佢,差佬又唔俾⋯⋯」

「你等等我,我即刻過嚟。」

振永慌忙地叫的士 U-turn 過去粉嶺,即是他爸爸住的那條村。在他到達時,已見遠處火熊一片,然後他走過去時卻找不到爸爸,消防員亦不肯讓他走入火場。然後他走進附近警署問他的爸爸的下落,職員們均說沒見過這個人,唯有報了失蹤案處理,振永其後焦慮地回到家,一直睡都睡不著,總覺得整件事很奇怪。

翌日,他如常回到電視台上班。豈料,在他的枱頭上放著一封白信封,其他同事亦面露無奈地看著他。他拆開那信封,五隻字「解僱通知書」出現了他的眼前,而他正想找 Chris 時,電視新聞的報導令他聚焦於電視中⋯⋯

「昨晚 11 點半左右,粉嶺虎地拗村附近發生四級大火,消防員花了四小時才將火救熄。根據現場報導,懷疑因為一名75歲男子在家中縱火,而火勢亦迅速蔓延到鄰近屋村。而警員亦即時拘捕該名男子帶回鄰近警署調查,但事隔了兩小時,該名男子被發現於警署羈留室內用電腦線上吊自殺,送院後證實不治,而該名男子後期查出正是 NiuTV 一名監製的父親。」

(待續)

 

facebook

啱睇就Like埋我地個Facebook專頁
香港土生土長的人,就讀於嶺南大學文化研究系。關心社會,熱衷於研究各樣文化及現象,熱愛研究韓國文化。

Leave a Comment

Your email address will not be published. Required fields are marked *