其實每個打工仔嘅時間都好寶貴

其實每個打工仔嘅時間都好寶貴

「食飯未?成九點幾喇喎。」我說。
「做埋少少走得。」Mike說。

「就嚟十一點喇,你唔好話我知你仲未食飯。」我說。
「未呀,無啦啦腦細話要改嘢,癡Q線!」Mike說。
「聽日先做啦,收買人命咩,日日都咁夜先收工!仲要無補水又無補假!」我說。
「聽日先做做唔切,樣樣都話趕,唉,星期六日腦細都想我返工。」Mike說。
「唔好返啦!你咁樣真係會死。」我說。
「邊有咁易死,做嘢先。」Mike說。

身為腦細,可能秒秒鐘幾廿萬上落,事無大小嘅事都要佢去處理或者落決定,時間梗係寶貴啦。但咁係咪就等如其他同事嘅時間唔寶貴?有時做完嘢要等腦細睇完批咗先叫任務完成,但係腦細日理萬機邊得閒理你,於是有時真係無嘢做都局住要坐喺度呆等到八點、九點先搵到腦細睇份嘢,而批嘅過程可能只係需要幾分鐘。

除咗因為等腦細而加班,絕大部分其實係因為忙到甩碌,唔加班真係趕唔切個deadline,至於點解咁忙,好多時都係因為工作量有增無減,人就越來越少,因為辭職走晒,又未請到人或者公司慳返唔想請。一個人嘅工作能力有限,於是chur到盡六點都係做唔切啲工作,只可以double甚至係triple咁去加鐘,而越夜個人係越無電,效率下降,可能十一、十二點個人已經function唔到,然後返到屋企已經係零晨,瞓唔夠幾個鐘又要起身再chur過。

比較有良心嘅公司加班係會計返鐘或者計返錢畀你,可惜大部分公司其實係乜Q都唔會畀,特別係廣告、設計同Marketing等等。佢哋永遠覺得人工唔止包你朝9晚6嘅時間,而係包起咗你成個人,即係包括放咗工嘅時間,而家有咗whatsapp就更加方便,就算放緊假都走唔甩。大佬呀,叫人做嘢係要畀錢㗎,幾時先可以改變加班合理化呢個觀念?有啲腦細仲會衰到覺得員工係突登加班呃鐘,講真我寧願唔要你嗰少少錢,我準時收工返去休息多啲唔好?

其實每個打工仔嘅時間都好寶貴,除咗工作,係人都需要休息放鬆、拍拖同陪屋企人,有返自己嘅生活,唔係只得生存。我知,工作只係用錢買人嘅時間,可惜你覺得自己一秒值幾錢同公司覺得你一秒值幾錢往往係有一個差距喺度,而打工仔一日唔反抗,一日都只係可以硬食。

「如果咁辛苦不如辭職啦,結婚簽張紙好平咋嘛,樓咁貴咪唔好買囉,其實而家住屋企不知幾好。」我說。
「得㗎喇,我頂得住。」Mike說。
「你係唔會知自己頂唔頂得住,到頂唔住嘅時候就已經太遲,其實做唔切咪話做唔切,你一日仲頂到,腦細一日都唔會再請人。」我說。
「我知,但係有時啲嘢真係唔係話咁簡單…」Mike說。

image : soonxer
啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *