可唔可以唔好咁輕易就放棄自己鍾意做嘅事?

可唔可以唔好咁輕易就放棄自己鍾意做嘅事?

「喂,做咩咁耐都唔蒲頭,差啲以為你被消失呀!」音樂會上我說。
「無呀我男友唔係幾鍾意我夾 Band,咪少咗出嚟玩囉。」好友 Crystal 說。
「吓?夾 Band 有乜唔好?」我問。
「佢話唔想我比人聊喎,夾 Band 多男人。」Crystal 無奈地說。
「唓,呢個世界唔係男就係女架啦,你唔記得咗我哋以前每個星期都練歌,準備比賽同出 show 嗰種熱血嗱?」我說,並且嘗試喚起 Crystal 內心嘅嗰團火。
「仲細咩,過多幾年都結婚生仔做師奶啦,仲熱咩血。」Crystal 說。

每個人都有唔同嘅喜好,可能有人鍾意玩水上活動,有人鍾意玩音樂,有人淨係鍾意打機。如果無傷大雅又唔係太過份嘅話,其實都唔需要為另一半去改變自己嘅喜好,因為可以喺空餘時間做自己喜歡嘅事其實真係幸福。扣除食、瞓、工作同交通嘅時間,其實私人時間已經所餘無幾,如果不幸要加班,更加係精神同肉體上都有心無力,有時間都只係想用嚟休息,所以能夠自由自在咁做自己鍾意做嘅事其實好難得。可惜人越大,反而越容易放棄。

「最近好忙呀。」
「今日要加班呀。」
「我有啲唔舒服嚟唔到喇。」
「好攰呀想休息。」
「唔得閒呀約咗男朋友呀。」

堅持就會成功,我信㗎!但係人總係會畀好多藉口自己,於是心態上慢慢就會越來越頹,開始懶,少練習,然後好正常地表現會越來越差,甚至有時咁啱遇上樽頸位,停滯不前,覺得無論點努力都係得個吉,跟住就會開始慢慢放棄。

「喂!Brenda,不如聽日出嚟夾 Band 吖!」中學生時期的 Crystal 說。
「傻咗呀你,琴日先夾完,我打鼓好鬼攰㗎,手仲痛緊。」我說。
「練多啲先會勁㗎嘛,下星期就比賽喇,仲有尖咀海旁個 show 呢你唔記得咗嗱?」Crystal 說。
「懶勤力啦你,唔好話我睇死你,你肯定三分鐘熱度,好快就唔再夾 Band。」我說。
「梗係唔會!就算係,到時你都一定會鬧醒我架嘛!你唔會咁易就放棄我呢個有機會成為全港最勁嘅女結他手掛?哇哈哈!」Crystal 得戚地說。

有時唔係人哋放棄你,最怕只係你自己放棄自己。

 

小盛女

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *