呢個世界真係咩人都有(員工篇)

呢個世界真係咩人都有(員工篇)

情境一

「你洗碗要隔渣呀,唔係會整塞條渠㗎!」經理說。
「阿姐我洗咗碗咁多年使你教!我不嬲都係咁洗㗎啦,有乜問題呀!」洗碗火雞姐說。
「唔隔渣條渠會塞,塞咗係咪你通?」經理說。
「我唔撈呀而家!癡線!」火雞姐說,便即日遞上辭職信,提醒人事部姐姐一定要出糧畀佢。

P.S.其實到底係邊個癡線?

情境二

「你知唔知呀!我嗰日去餐廳食飯,竟然見到有塊膠布喺碟齋菜度!真係想作嘔!」朋友黑仔王說。
「下!塊膠布有無血㗎?」我說。
「我點鬼知呀!唔敢睇啦!嚇到傻咗!發誓以後都唔會再去!」黑仔王說。

P.S. 你以為咁樣好誇張?我聽過最誇張係食炒飯見到有隻銀牙,我唔係打錯字,唔係銀芽,係真係一隻銀色嘅牙!至於點解會跌落去,我都唔敢再諗……

情境三

「加加水吖唔該。」客人說。
「你叫我加水?你好無禮貌!我要報警!」侍應火爆姐說,然後不停指住個客嚟鬧。
「冷靜啲先,發生咩事?」經理說,並將將火爆姐拉埋一邊,想話將佢同個客分開。
「你做咩打我!我要報警!」火爆姐說。

無幾耐有兩個警察就到咗。

「不如開間房同你傾傾頭先發生咩事,始終呢度比較多人,會騷擾其他食客。」警察說。
「唔得!我就要喺呢度講!」火爆姐說。
「好,睇返cctv,見到呢位女同事無打你喎,只係將你拉埋一邊。」警察說,然後想搵其他人做證,但係個個侍應都突然變咗又聾又盲,咩都話睇唔到聽唔到。

最後火爆姐報咗幾次警,浪費警力,搞咗幾粒鐘先肯走,最後仲要大大聲話:「而家係我唔撈,唔係你炒我!」公司仲即刻出埋糧畀佢,費事有機會畀佢再返嚟搞搞震。

P.S. 其實佢係精神有問題定純粹想呃錢?

其實我經常都聽/見唔少呢啲其人怪事,通常都係以花生友心態,笑完就算,但其實有時諗返,真係完全唔明點解會有人咁諗同咁做,大家又有無遇過呢啲事?

 

facebook

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *