唔怕柒,其實都係一種技能

唔怕柒,其實都係一種技能

由細到大我都好細膽,做任何事都會淆底,所以我從來都唔會做風頭躉或者 leader 嘅角色,多數都係默默做,勤勤力力,平平凡凡嗰種,但勝在同大部分人都溝通到,關係唔錯,所以條路會易行少少。人大咗就會發現出嚟做嘢都唔係一個人叻晒就得,好多時都要講求 team work,識得點同唔同類型嘅人相處其實更加重要。

凡事都有兩面,一係成功一係失敗,過往我都好少嘗試,因為唔試我就唔會失敗,唔會柒,唔驚會畀人笑。唔知點解去到高中嘅時候突然開咗竅,自己一個報名參加交流團,其他同學仔都專注高考無去到,所以我就同埋啲初中同學仔去咗外國,由於佢哋太細個,所以只會留喺一個班房度聽鬼佬鬼婆教書,而我就自己一條友去同其他外國人一齊上堂。

唔好以為外國人就一定對人好 nice,最初幾日真係無人同我講嘢,我英文又唔係好,淆底症發作,驚講得樣衰畀人笑,於是更加唔敢主動聊人講嘢,變咗個啞人。但係嗰陣得我一個人,如果我唔主動啲,真係無人幫到我,唯有豁出去,以反正柒咗都無人知嘅心態去聊人傾計,點知又真係 work 喎,仲因為教佢哋講廣東話粗口而無啦啦 friend 咗,題外話其實佢哋英文 grammar 都成日錯,根本唔會介意你講得好唔好,只要你夠膽講就得。

返到香港之後都試咗好多我從來都無諗過會做嘅嘢,例如做售貨員賣西裝、美容學徙、Asian Beat、Tom Lee Music Carnival、Working Holiday 等等,當中都發生過唔少柒事,然後我就開始發覺「柒」其實都唔係真係咁得人驚啫!對上一次淆底就係出書,最初直情有諗過拒絕出版社邀請,因為我喺度諗:「出咗書無人買咪好柒?」而家睇返轉頭,真係好慶幸當時自己有好好捉緊呢個難得嘅機會。

怯,你就會錯失好多機會,工作如是,溝女如是,做人更加如是。

 

facebook

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *