就算我身無屎,都唔代表你可以 check 我 WhatsApp

就算我身無屎,都唔代表你可以 check 我 WhatsApp

我從來都唔會check另一半嘅電話或者Facebook,有時知道佢同緊另一個女仔 whatsapp,即使嗰個係佢以前鍾意過嘅人,係會有少少唔開心,但佢話要畀我睇佢哋嘅 whatsapp對話以表清白我都係唔會睇,因為我覺得睇嚟都嘥氣。首先佢畀得我睇嘅肯定都已經無嘢好睇,二嚟大家都係講個信字,check嚟check去你唔煩我都煩啦。再者,其實我check唔check都好,你要出軌我根本阻你唔到,正所謂留得住你個人都留唔住你個心,咁不如連人都唔好要。

至於偷雞check我就更加唔會,我又唔係醒目嗰啲,硬係覺得一做衰嘢就會畀人發現,好似以前返學我都唔敢出貓同上堂偷食。將心比己,無人鍾意畀人check住晒,所以我都係絕對唔會畀人check我電話,任何人都唔得。當然我都唔會鬼鬼祟祟咁用電話,有時同男友一齊用電話睇片彈咗啲message出嚟,咁啱佢睇到都無乜所謂,我唔會變態到要佢即刻合埋眼,而且佢都無興趣check我電話,又或者係因為佢知我唔鍾意畀人check。

其實一段關係入面信任係好重要,當然前題係雙方都要識做啦,就係同異性朋友保持適當距離,注意言詞,flirt 係禁忌,唔好同我講埋晒啲咩「我唔知點先算係 flirt」,咁大個人識衡量啦,我都唔想當你弱智。當雙方有足夠安全感,就唔會再成日疑神疑鬼。不過呢個完全放任政策唔係對每對情侶都適用,請自行調節底線,同埋係會有風險,就係可能你奶咗嘢/戴咗綠帽都完全唔知。

如果同我男友比較,反而有啲女性朋友更加鍾意裝我用電話,有時我打緊whatsapp佢都會伸個頭埋嚟睇我打緊乜,然後搭兩句嗲,其實我好唔鍾意呢個行為,可能我個人比較著重私隱啦,通常我都會縮開唔畀佢睇,佢就會話我懶神秘,一定係講緊啲唔見得光嘅嘢,但其實我可能只係同男友打緊句:「好掛住你呀BB。」肉麻到死唔想畀你睇亦唔需要畀你睇。

每個人都需要啲私人空間,所以無論係朋友、親人或者係愛人,都唔好再逼得太緊喇。

image: huffpost
啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *