揀水鞋同揀男友一樣咁難

揀水鞋同揀男友一樣咁難

連續幾日都落狗屎,就算有帶遮都係全濕,最慘係周地水氹,一唔小心踩中咗對鞋就拜拜,有時附近嘅人踩中都一定遭殃。話說有次我趕住過馬路,一嘢踩咗落水氹,唔知對鞋穿窿定水花太勁,即刻成對鞋連襪濕晒,醃住對腳,行路仲要發出滋滋聲,好慘,同時間我望住身邊嘅OL個個都身輕如燕,面對水氹都毫不猶豫咁直衝,佢哋唔係識輕工水上飄,只係因為佢哋都著住一對水鞋。

水鞋都有好多款,我揀嘅時候主要係著重個款好無睇、長度、重量、透氣度同舒適度等等。好現實,揀水鞋同揀男朋友一樣,第一樣一定係睇樣,唔係話唔著重內在,唔係話一定要好靚,只係如果你第一眼望落去對水鞋度已經完全無好感,我肯定就算個售貨員之後無論點sell你都好,都係唔會成功。至於好唔好睇呢家嘢其實好主觀,正所謂情人眼裡出西施,有人鍾意五顏六色夠繽紛,有人鍾意淨色夠沉實,有人鍾意有花紋,我個人就鍾意黑色,型得嚟又唔怕污糟。

揀完款就到揀長度,高筒、中筒、低筒,我一定唔會揀高筒,雖然保護度高,但係箍住成對腳好唔舒服,焗住晒,實在係迫得太緊,對於束縛不來如人馬座嘅小妹真係唔太適合。中筒就比較少選擇,正常嘅梗有啲款出得少啲,等人爭下。夏天落雨多,所以我都鍾意低筒,無咁熱,不過低筒都有分窄口同闊口,闊口嘅話行嗰陣會不斷磨擦對腳,搞到好痕,甚至損,所以要著長襪或者絲襪擋一擋,同埋大雨有機會會入水,所以窄口應該好啲。

至於重量,梗係輕身好啲啦,很步路都無咁辛苦嘛,另外,仲有透氣度同舒適度都好重要,有時對水鞋好靚,但係一著上去唔舒服,都只能夠放棄再搵過。就算係名牌都唔一定好著,一定要親自試過先得,而且買水鞋好講緣份,就算你經歷千辛萬苦終於畀搵到對心儀嘅水鞋,點知售貨員同你講:「唔好意思呀小姐,斷晒碼喇,無38,得37。」即使你格硬將佢著上,始終唔啱就係唔啱,勉強無幸福,只會著壞腳,唯有當你哋有緣無份啦。

呢個世界無完美嘅水鞋,個款靚可能就著得唔舒服,著得舒服可能又唔啱長度,啱長度可能又太貴,然後我就發現,其實揀水鞋同揀男朋友一樣,只可以靠感覺。

P.S. 呢篇非廣告,純粹呢幾日落大雨好慶幸自己有對水鞋,題外話,男仔無水鞋著點算?女仔又著開邊款水鞋?

image : groupon 
啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *