有人問你借錢,借定唔借?

有人問你借錢,借定唔借?

我記得細個嘅時候,有個好朋友問我借幾千蚊,佢話屋企有急事,十萬火急,佢都係迫於無奈先問我借,我當時又唔夠咁多錢,於是我就問爸爸借。

「爸爸,可唔可以借二千蚊畀我?我有個朋友屋企有啲急事。」我說。
「我可以借畀你,不過你自己決定借唔借畀你朋友。」爸爸說。
「咁如果你係我,你會唔會借?」我說。
「咁就要睇下你同呢個朋友嘅交情喇,同埋你要預咗呢筆錢借咗出去未必會收得返,如果你咁都 OK 咪借囉。」爸爸說。
「嗯,我知道喇。」我說。

問我借錢嗰個係我死黨,所以我信得過佢,如果真係衰咗嘅咪當買個教訓囉,當用幾千蚊去睇清一個人,當然我亦都考慮過無咗呢筆錢嘅後果我承唔承受到啦,我估做下暑假工應該都還到錢畀阿爸嘅,所以我最後都係決定借畀佢。佢亦都好快就還返晒畀我,仲好感激我幫佢渡過咗呢個難關。

曾經聽過阿邊邊個唔還錢,搞到連朋友都無得做,或者係某親戚借完錢走佬嘅事件。唔熟唔食,唔排除真係有啲咁衰嘅人,你估個個都可以有福同享,有難同當咩?所以我盡量都唔會同朋友或者親戚有任何錢銀上嘅瓜葛,因為錢真係萬惡之源,明明一個好好嘅人,都可能會因為錢而突然性情大變,我唔希望因為錢而破壞大家嘅關係。

我一向都好少問人借錢,除咗嗰次幫朋友問阿爸借,因為唔想好似欠人人情咁,但唔係個個都咁諗。話說我有個同事竟然夠膽死用公司明義去問貨客借錢,仲要借兩個星期都唔還,畀貨客追上門,之後發現原來佢已經周圍借咗幾個人錢,最後佢當然畀人炒咗魷魚啦。

一世人流流長,總會有機會遇到有人問你借錢,至於借定唔借,就要睇返你同嗰個人嘅關係有幾好,金額有幾大,自己有無能力借同埋借錢嘅原因係咩,係救命定係賭錢(當然佢借嚟賭錢都可以呃你話係救命),可惜即使理性上衡量過以上幾點,覺得唔應該借,最後都可能畀感性元素打敗,推翻晒所有理性判斷。

「如果第時有朋友問你借錢點算呀?」我問。
「唓,我話我交晒啲錢畀老婆,每個星期得幾百蚊食飯,咁咪得囉。」男友 Mike說。
「吓,咁你啲朋友咪會覺得我好似隻老虎乸咁囉。」我說。
「咁你想人哋覺得你係老虎乸,定係我做義氣仔女借啲錢出去?」Mike 說。
「……老虎乸。」我說。

有人問你借錢,借定唔借?

 

facebook

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *