細心比浪漫更得女人歡心。

細心比浪漫更得女人歡心。

九十九支鮮花、燭光晚餐、迷人首飾,基本上冇咩女性唔會對依種浪漫攻勢動心(前提佢對你要有好感先啦當然)——不過浪漫唔可以日日搞,一嚟驚喜太多都會變悶,二嚟你個荷包承受力有限。身為男性想氹身邊女友歡心,但經濟能力同諗頭都有限?唔緊要,只要你明白細心嘅重要性,你都可以令你女朋友開心過每一日。

細心嘅男性有咩吸引?試諗下你喺最需要幫手嗰陣有人向你伸出援手;又或者你喺廁格冇哂廁紙然後出面有人拋卷紙比你嗰種感覺,你會覺得對方根本就係你嘅守護神。女人要求多,需要多,同樣比你展露細心一面嘅機會真係數都數唔哂:食嘢用哂紙巾,你拎包新嘅出嚟再幫佢抹埋嘴角;入到商場打哂冷震,你除件外套比佢笠住;每個月總有幾日唔舒服,你會沖好杯黑糖茶比佢外加暖水袋暖肚等等,基本上你只要搵到一個佢需要幫忙嘅位,然後默默準備好佢需要嘅,最後再用一個望住最愛嗰種甜入心嘅笑容去結尾,依種甜密就係女性喺一段關係最想搵到嘅其中一種感覺。

你可以花心思去為一個特別日子準備好種種驚喜,但愛應該係無時無刻都存在喺你地身上。日常生活點樣對你女朋友比起大時大節先會「突然愛佢」嚟得重要,就好似你每年淨係母親節同啊媽食一餐飯唔代表係孝順一樣。每個女性都想笑住過一年三百六十五日,而唔係每年等到情人節先牛郎織女相會咁比男朋友重視。你可以見到拍咗幾年拖都仲係相愛如初嘅情侶,好多已經去到唔需要講出口就明白對方諗咩要咩,提早為對方做好一切。依種默契,習慣只有兩個每日都愛住對方嘅男女先可以做到。若果你搵到一個咁好嘅情人,其實情人節同拍拖記念嘅慶祝只係一個 Bouns:有當然開心,但就算冇都唔會影響你地本身已經融洽嘅關係。

最近大家講嘅暖男,其實咪就係依種了解女性需要,體諒而又貼心嘅人。追求一位真心愛自己嘅男性,係好多女性心目中一個不可或缺嘅要求,而細心嘅男性就最易令到女性喺一段關係當中感受到愛嘅存在。與其你提早一個月就諗定拍拖記念去邊度食好,不如關心下今晚你女朋友點解成日㩒住個肚,又或者下你係咪仲係掛住打機唔理佢?

當然啦,男朋友再好,都要做女仔嘅你識珍惜,咁你地嘅關係就完美啦。

 

Photo: internet

FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/

啱睇就Like埋我地個Facebook專頁
你有多久沒去找自己的理想?搏殺一天,回到家,倒頭就睡。無言,只因生存太累。談理想?妄想;毛言仍言,只因理想,本就是「理應去想」

Leave a Comment

Your email address will not be published. Required fields are marked *