自此以後,我終於解開了心結

自此以後,我終於解開了心結

副題:從前有個男仔好鍾意格仔裙,有一日,比個女同學殺死咗……

個男仔就咁嘅,有170公分,這中生嚟講都算係人一個。

而且個樣都幾「未來嘅社會動梁」下咁,總之就呃得下人啦。

不過好衰唔衰,佢有個幾煩嘅習慣,就係特別鍾意望住著格仔裙嘅女仔!

唔係話街邊行過都睇到實,佢執迷個種程度係一路望,望到比個女同學車一巴先知咩事個下大獲。

咁佢又唔係真係做啲咩好過份嘅事,不過香港大家都明,

男男女女都係好燥底,唔讓坐就好似殺咗佢老豆咁。

一個十八廿二嘅靚女著住格仔裙比人望到實裙腳,

就算嗰個係阿婆都會告你性騷擾喇!

呢個男仔仲夠膽死去一間香港出名夠靚嘅格仔裙校服到讀高中,

結果咪命都無埋囉……

係過去中四呢一年,呢嗰男仔一直比班女仔誤會佢變態,但又好好彩,比班男朋友當佢神咁拜,因為佢係班男仔心目中就好似一盞明燈咁,喊到出樣!大家點會唔當佢係Friend先。不過成班豬朋狗友中,都有一個兄弟係知道佢只係好格仔裙,而唔係裡面個部份。

「喂……你不如改下你啲習慣啦,你咁溝唔到女架!」就係個Friend同佢講緊嘢時,突然有一個女仔走過嚟,車咗個男仔一巴。

「望夠未呀你!再係咁告比Miss知架!」嬲爆爆嘅呢個女同學走咗,佢個兄弟就望返住佢講:

……你真係收檢下喇,再係咁你比人摑到豬頭喇叭嘴架啦。」呢個時候,個男仔好灰氣咁終於開聲:

「其實我只係鍾意格仔裙先嚟呢到讀書即,你知唔知我嚟呢到之前,簡直覺得呢到係天堂… …不過宜家… …我真係知道咩叫一念天堂、一念地獄……你教我點做好呀?」開始發癲嘅呢個男仔,同佢個兄弟坐咗係樓梯第二級到,一直唔知點算。

「都叫你唔好望得咁狼囉!」

「我真係控制唔到自己,你明唔明?啲女仔真係唔知咩叫『fat唇』,邊有人著格仔裙短到好可以睇到入面條PE褲架?又唔熨下條裙,好似頭先嗰件蛋散咁,啲摺痕勁過百摺裙,搞到啲格仔款錯曬!仲有仲有,著到『絕對領域』我都算,都叫好睇,但佢唔好係大脾隙生瘡好嗎?想點呀?內分秘失調呀?」

「咁……又真係幾大獲……」聽到呢點,個兄弟都頂唔順要和議一下。

「我真係頂唔順呢班女仔點解要污辱咗我最愛嘅格仔裙呀……」講到咁,佢真係忍唔係借佢兄弟個搏頭喊咗出嚟。

就係咁悲傷嘅畫面到,突然出現咗同香港唔係好夾嘅人物出現,佢著住一件正規冬季校服,格仔裙腳同高身嘅長襪啱啱好展示正確嘅「絕對領域」,而且有啲白到反光添。頭髮係前派幾HIT嘅韓式梨花頭,加多個咖啡杯髮夾係前蔭,個樣有啲似日本人,仲要係未夠十八嘅學生。佢笑笑口咁對住兩個男仔講標準嘅廣東話:

「唔好意思,你哋識唔識一個……係學校出曬名……好鍾意格仔裙嘅男同學?」

單單係佢講廣東話呢一點,已經令兩個男仔都愕咗,而且係因為兩個男仔都係坐係樓梯級到,所以個女仔只可以彎前小小去問佢地,個畫面就靚到兩個男仔都失曬魂咁。再諗多少少,搵鍾意格仔裙鍾意到出曬名嘅,都係得一個人,不過佢兄弟幫佢反問:

「雖然妳係講廣東話,不過我唔係好明妳想問咩。」呢個時候個女仔有啲尷尬咁chokchok樣,嘆氣再講:

「因為我係啱啱轉校嚟,聽聞呢間學校有個咁嘅變態,所以想問吓即。」嗰男仔聽到當場灰咗,佢個兄弟都係到笑住答:

「咁妳應該去問班女,唔係問我哋呀嘛……」之後個女仔又傻笑咁講:

「因為你哋個樣幾可靠,所以咪問下你們囉……呃!係,唔好意思,我未先我介紹添……

「唔洗介紹喇!妳唔會想識我架!」呢個時候個男仔突然爆seed,個女仔同佢個兄弟都唔識比反應佢。

「我就係妳想搵嘅變態!我已經忍咗一年,我只不過係鍾意格仔裙之嘛!我從來無諗過淫嘢,就好似一啲人鍾意喱士、有人鍾意間條、有人鍾意波點咁,有咩問題?咁個女仔著得好睇咪望多幾眼囉,著得唔好睇就自然覺得好唔順眼,想睇下有無優點改善下,唔通呢啲唔可以係嗜好咩?唔通我要自己著條裙仔裙嚟欣賞自己呀?點解個天咁唔公平,要我鍾意啲咁嘅嘢?我做錯啲咩呀?」

呢個男仔一口氣將呢段時間嘅冤屈氣爆哂出嚟,無他,因為面前嘅係靚女,仲要有啲一見鍾情添,比自己鍾意嘅人未開波已經討厭,同踢波先讓五球無咩分別,咁不如擺踢。

……太好啦……果然你真係個狂熱者……」一反常態,個女仔竟然笑,仲笑得鬼咁靚添。

個男仔覺得好似捱咗八千幾個鐘頭嘅地獄,終於見到天使啦……不過……點解個天使會係一道藍光中間,攞咗把大鐮刀出現,仲隱約聽到佢講:

「咁我可以殺咗你…………」個「喇」字都未講到出口,男仔先發現呢把唔係鐮刀,係一把手柄係中間,有兩邊刀鋒伸延出嚟嘅半圓形彎刀,就好似把回力標咁……不過更大嘅發現係,個男仔見到自己個肚被人片咗一嘢。

「嘩……」但好奇怪,成個世界都好似入咗慢鏡咁,個男仔就見住啲血好似爆水喉咁噴出嚟,佢個兄弟就係則邊好似「奪命狂呼」嘅面具咁,唯一唔同嘅係,個女仔仲好正常,又想片多嘢……

「我真係咁大獲……鍾意格仔裙都要死?」

……對唔住……呢個係我嘅任務……你一定要死……」唔知點解個男仔速度可以跟到個女仔,呢一點都唔去深究。個男仔知道自己要死,其實都生無可戀,結果就做咗一件事,令個女仔呆咗……佢用力抱住個女仔下面……即係條格仔裙。

「咁妳就由得我……死係格仔裙身邊啦……」呢個時候身為女仔比人用臉貼住,就好自然咁爆seed,好用力咁成全佢去死啦!

突然間,個男仔身上爆出咗一道紅光,力量大到將個女仔彈開,把刀飛咗一邊,自己就撞穿咗後邊班房嘅牆跌咗入去。之後就聽到成個世界變返原形,有同學係到講:

「嘩?佢咩事呀?」

「豆腐渣工程呀?」而係同學當中,有一個真係幾靚仔吓嘅男仔講咗句唔知咩文:

Protekti。」之後,成個世界以佢為中心,一個藍色嘅空間開始擴展出嚟。

「咩…………料呀?」個男仔都未驚完,個兄弟已經見到個女仔又走出嚟揮拳,但動作被個男仔睇穿曬,左右手都被個男仔捉住咗,見個女仔一啲都唔冷靜,個男仔就一嘢頭鎚中佢前額。

「妳冷靜啲呀!」個男仔鬆開手,個女仔就暈暈地咁跌咗係地下,一直撳住個頭罵返個男仔。

「你先唔冷靜呀!」

「突然唔知邊度攞把嘢劈我叫冷靜?妳宜家係殺人呀!」

「你睇下你自己!人會被人劈完即刻無事嘅咩?」

「我無事?我睇住自己啲血……」個男仔摸一摸自己條腰,唔好話刀傷,就連件衫都無事。

「咁嘅?」就係佢發呆個陣,佢兄弟一手拉開佢。

「個空間伸到個嚟啦!快啲走啦!」其他佢根本無影響,不過佢個兄弟就咩都唔知。算啦,個男仔都照聽佢話跟住走,始終宜家都係一頭冒水。

「妳點搞架?做咩咁突然出手?」

「佢係『Iluzio』世界嘅統治者之一,我一定無睇錯……

「如果係咁就煩……我哋分頭追……

個兩個男仔一口氣走到地面,諗住走出校門就無事。

「轟隆!」係佢哋後面飛咗一把回力標出嚟,將成個門口炸爛咗。個把嘢仲自己飛咗去返去後面個主人到,即係個女仔,原來佢已經企咗係外面嘅操場。

「咁……走後門啦!」當個男仔想走嘅時候,佢先發現返轉頭個把回力標而且斬斷咗佢兩對腳。

「喂…………點會咁架?」佢個兄弟咩都唔諗,即刻拖佢個身走,但邊有可能夠個女仔快。

個兄弟同個男仔一抬頭,個女仔把刀已經係面前。

「救……救我呀!」就係臨死一刻,佢兄弟都無同佢放開過隻手。就係呢到,奇怪嘅事生發咗!

「我唔會比機會你再生……」個女仔講完,個男仔就被佢正面劈咗一下,當場死亡。

而佢個兄弟都嚇到呆咗。

個女仔好唔開心咁走到個兄分面前講:

「對唔住……我殺你個朋友係逼不得已……好快你就唔會記得佢……

「做咩殺我……」個兄弟語無倫次,呢個時間,個女仔都唔覺得有咩問題,用自己雙手放係個兄弟嘅頭到,講:

Forviŝi……」力量就由個女仔身上傳到個兄弟嘅腦到……不斷將佢嘅記憶修改。無意間,佢女仔感覺到有小小反抗嘅力量,不過都係一陣,之後又事,成個世界靜哂。

「搞掂喇?咁我用力量將呢到還原,之後先返酒店休息。」個女仔臉上流咗幾滴眼淚。

「放鬆啲……我哋唔係殺人,佢哋係會影響世界嘅生物……唔洗咁內疚……」個女聽完,嘆口氣,離開呢個地方。

當以為呢個故事完結之後,我先想同大家講,我就係死咗嘅男主角,我叫六方。而好唔好彩,我發現自己去咗一個點都諗唔到嘅地方,就係殺咗嘅呢個日本妹嘅身體入面,佢叫做羽田光希

於是我哋就兩個人,一個身體咁……快快樂樂……又吵吵鬧鬧咁……開始我哋生活。

能夠用女仔嘅身份去著格仔裙……

「自此以後,我終於解開了心結」……才怪!

 

文: 多媒體廢作人

啱睇就Like埋我地個Facebook專頁

歡迎各位讀者踴躍投稿,來稿請電郵至 info@menjap.com

Leave a Comment

Your email address will not be published. Required fields are marked *