邊個大聲,邊個就係道理?

邊個大聲,邊個就係道理?

Ken哥係公司嘅老臣子,負責採購同管倉,可以話係一人之下,萬人之上,除咗腦細,無人搞得掂佢,個個都要睇佢面色。十次有九次我見親佢都係大大聲咁鬧緊人,真係好彩我唔係直接隸屬佢。除咗黑面,佢仲有一大特色,就係無論發生咩事都一定會大大聲凶咗人先,就算後來發現原來係自己錯,佢都唔會講sorry㗎喎,點都可以賴落你度鬧你,總之你錯佢就鬧你,佢錯都係鬧你。

「Ken哥,個客嗰邊打嚟話仲未收到貨呀。」我說。
「挑!點會未收到!肯定又係你落錯單啦!你check清楚先再同我講!」Ken哥說,佢又想耍走我。
「我已經check清楚,一定無錯,email有晒紀錄。」我說,初初入職都仲會畀佢大到,而家我唔會再縮。
「傻㗎你,我都唔睇email嘅,肯定因為咁就漏咗啦!」Ken哥說。
「我之前已經print咗個email同你講過一次。」我說。
「我咁忙,邊理到咁多嘢!你琴日又唔提我!」Ken哥說。

最後我都無同佢嘈,慳返啖氣好過,但係我想講佢呢招真係幾work,我見過好多人都係因為咁而畀佢拋窒,以為係自己做錯或者做漏嘢,其實都好正常嘅,邊有可能樣樣嘢都記得咁清楚,於是畀人凶一凶咪會怯囉,佢仲要講到大大聲,全世界都聽到,仲成日加個「又」字,令到腦細或者其他同事都覺得你成日做錯嘢,粗心大意,好彩我一直喺公司都係安守本份,勤力盡做嗰種員工,唔係真係隨時躺著也中槍。

有時我都會好羨慕呢啲咁強勢嘅人,可以食得住其他人,唔會比人恰,但係每個人嘅性格都唔同,我好肯定自己唔係呢種。腦細有時得閒都會同我講下人生大道理,佢同我講:「做領袖唔係靠惡就得,最重要係包容,咁先可以以德服人。」距離做領袖,我當然仲差好遠,但係如果將來有機會,我都希望可以做到腦細所講嘅領袖,而唔係純粹靠惡去凶人。

image : english harmony
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *