邊個蝦我屋企人都唔得,男朋友都無面畀!

邊個蝦我屋企人都唔得,男朋友都無面畀!

「好飽呀。」Mike說,然後拎住碗飲剩幾啖嘅湯想企喺身。
「你做咩呀!?」我說,我心知不妙,於是即刻截住佢。
「我諗住倒咗啲湯佢咋,飲唔晒呀,好飽。」Mike說。
「梗係唔得啦!想死呀你!倒我阿媽啲湯!」我說,一句激嬲女朋友原來仲有呢句做例子,而阿媽就喺旁邊偷笑咗一聲。
「好飽飲唔晒咪晏啲先飲囉,總之邊個都唔可以倒我阿媽啲湯,知道未?」我細細聲說。
「知喇,sorry sorry。」Mike說。

其實呢件只係好小事,我當然知道佢係無心,純粹真係飽得滯,飲剩幾啖。但呢碗湯真係唔止係湯咁簡單,呢碗湯唔同出面街買嗰啲,你知唔知煲一煲湯幾辛苦,要買材料,要洗,要切,要分先後次序落材料去煲,要睇火,要調味,呢煲唔止係湯,更加係心機。

煲湯話難唔難,話易唔易,你可能覺得:「唓,將所有材料掉晒落去,煲佢幾個鍾咋嘛!」但係你唔好唔記得,除咗煲湯,仲要買餸同煮飯,唔好計煮,你淨係買材料,預幾個人份量,其實都好重,日日咁拎法,真係舉啞鈴咁款,練到手瓜起腱,我仲記得幾年前開始阿媽就開始手痛,成日舉唔起手,我都無再叫佢幫我剪頭髮,話說以前係我阿媽幫我剪頭髮,詳情可以睇返呢篇舊文《我的髮型師媽媽》

做家庭主婦真係好辛苦,除咗買餸煮飯洗碗洗衫打掃,仲有好多濕碎嘢要做,做仔女嘅返工當然壓力大又辛苦,但放工返到屋企就可以好似大小姐大少爺咁攤喺梳化度等食,玩Facebook盡情放鬆,但「阿媽」呢份工係無得放假,星期一至日,二十四小時,例如我無啦啦凌晨頭暈身㷫佢都會起身照顧我,又或者係我加班到好夜都未返佢會十萬個擔心,真係養一百歲,長憂九十九,所以大家真係要好好愛錫媽媽,今晚食完飯唔好再講:「媽咪,今晚有咩生果食呀?」不妨講:「媽咪,辛苦你喇。」

P.S. 其實Mike不嬲都對我屋企人好好,大家都相處得唔錯,係衰咗呢次咁大把,咁又小心啟發咗我寫文,陰公。

image : huffpost
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *