食飯訂位係咪真係咁重要?

食飯訂位係咪真係咁重要?

情境一

「兩位吖唔該。」我說。
「無訂位門口呢張啦!」侍應說。
「有無其他?」我問。
「等卡位呀?企出面等啦!」侍應說。

於是我就乖乖咁企喺門口等,等咗5分鐘覺得好傻仔,點解唔坐住等。

「我可唔可以坐住門口呢張等?」我說。
「唔得呀,要做生意。」侍應說。
「我明,一有客就畀返張枱你。」我說。
「下,是但你啦。喂!等卡位嗰個話佢坐住呢張等喎!」侍應大喊,其他食客都望住我。

五分鐘後。。。

「唔該可唔可以畀個餐牌我睇下。」我說。
「你係坐呢張㗎啦嘛?你唔等卡位啦嘛?無得再轉枱㗎。」侍應說。
「係。」我說,因為太肚餓,我都無再同佢拗話點解之後無得再轉枱,雖然隔離張卡位已經就嚟食完。
「喂!等卡位嗰個唔等喇,佢話坐呢張喎!」侍應大喊,然後終於有侍應畀餐牌同茶我。

情境二

餐廳入客率得三成左右,我眼金金咁望住窗邊個卡位,然後個侍應真係帶咗我同男友去卡位度坐。

「好開心呀有得坐卡位。」我笑說。
「唔好意思呀呢張枱畀人訂咗,麻煩你坐旁邊呢張二人枱。」另一個侍應即刻仆過嚟講,我只係坐咗張卡位一秒。
「下,三張都畀人訂咗?」男友說,當時係有三張吉嘅卡位連住,時間係1:45pm。
「係,三張都畀人訂咗,兩點 booking。」侍應說。
「咁如果無人嚟係咪可以畀返我哋坐?」男友說。
「如果no show係可以。」侍應說。

最後我哋坐到三點幾,都只係得一張卡位真係有人嚟坐,而個侍應當然無過嚟問我哋要唔要轉枱啦,我哋已經食咗一大半,亦無謂再轉。

情境三

「可唔可以坐左邊個假草地?」我說。
「唔好意思呀畀人訂咗。」侍應說。
「咁坐窗口位呢。」我說。
「都畀人訂咗,得返門口張四人枱。」侍應說。
「OK。」我說,只怪自己又無book位啦。
「唔好意思麻煩你哋打對面坐吖,唔好平排坐,一陣可能有其他客人。」侍應說。
「OK。」我說,然後心諗有客先轉唔得咩?又唔係爆場。
「唔好意思麻煩你哋轉去二人枱吖,因為岩岩有四位客人。」侍應說。
「OK。」我說,都無得唔OK啦其實。

有時唔係話唔想預早訂位,但係平日夜晚真係隨時都會OT,都唔知幾點先可以收工,點訂啫?有時就係即興想食某餐廳,咁無訂位如果滿座無得食都好正常,但最常出現嘅反而係有好多位但都唔會畀你揀位坐,個個位都係「話」畀人訂咗,但係次次我食飽走嘅時候啲位都係吉嘅,可唔可以唔好當我係弱智呢?我寧願你直接同我講:「唔好意思呀卡位我哋要留畀三位以上嘅客人。」你咁答我都仲 gur啲。再者,我訂咗位又唔見你畀個好位我坐㗎喎,根本「兩個人」就係最不被重視。

在商言商,如果我係老闆,有兩個客入嚟,我都會放佢哋喺二人枱,卡位坐到四個人,梗係留返啦,有機會賺多兩個人錢嘛!但係當個場靜英英,而個客人又有要求嘅時候,係咪可以嘗試滿足佢呢?頂多咪加返句:「唔好意思呀如果一陣人多可能麻煩你哋要轉返四人枱。」咁咪皆大歡喜囉!短期睇你只係賺到兩個人錢,但係如果一張卡位可以令佢哋坐得舒舒服服,可能佢會介紹畀朋友,朋友又再介紹畀朋友,客就係咁儲返嚟。相反,唔好嘅服務除咗令佢食得唔開心,分分鐘佢仲會同朋友投訴,甚至寫篇千字文嚟發泄。。。

image : barsandbooths.com
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *