可唔可以唔好再飲啲味精湯呀?

可唔可以唔好再飲啲味精湯呀?

「你又飲味精湯。」我說。
「好味吖嘛,你無聽過喺日本食拉麵係要飲晒啲湯先代表你尊重廚師嘅咩?」Mike 得戚地說。
「但係呢度唔係日本,同埋我都幾肯定呢個係味精湯,仲要咁咸,飲咗對身體唔好呀。」我說。
「有湯點解唔飲?」Mike 說。
「都唔係煲湯啲湯,無益架。」我說。
「好啦,咁我淨係飲一啖啦。」Mike 說,然後佢就成碗捧起倒落口,原來咁叫一啖。

無論係拉麵、車仔麵、擔擔麵、喇沙,甚至係公仔麵或者杯麵,Mike 都好鍾意飲晒啲湯,因為覺得夠濃夠咸好好味,而我就極少飲,頂多都係飲一兩啖,可能係因為由細到大阿媽都同我講呢啲係味精湯嚟,無益,叫我唔好飲。所以當我同 Mike 一齊食麵嘅時候,我成日都會叫佢唔好飲啲湯,不過我有張良計,佢有過牆梯,當就嚟食完碗麵嘅時候,佢就會好醒目咁淨係夾一兩條麵碎落個大湯匙度,然後放滿湯,我一話佢飲湯佢就好理直氣壯咁話:「啲麵未食哂喎!」

其實我都知做女朋友係唔應該做到成個阿媽/管家婆咁,但係我又好想為佢健康著想,啲湯好多時都有落味精,就算無落都好咸,題外話,其實食得過咸或過甜對身體都唔好。我仲記得有次因為佢飲咗好多杯麵嘅湯而發氣咁話:「飲啦飲啦,你飲晒佢啦,我以後都唔會再話你,你鍾意點就點。」而家諗返起都覺得好無聊,所以之後我通常都係提一、兩句,或者眼定定咁望住佢,而佢就通常用返佢嘅「麵碎絕招」同埋循例都會飲「一啖」嚟回應我。

其實我梗係知味精湯好飲,正如所有邪惡嘅嘢食都係美食一樣,例如芝士薯條、炸雞髀同韓燒等等,可能你話久唔久一次唔怕啦,但係出街食飯其實已經好容易多鹽多糖,我都係盡量想減輕少少啫,又唔係一啖都唔飲得,飲少啲啫。相反,佢係會不停叫我試下飲味精湯,但係由於我畀阿媽由細訓練,已經近乎係百毒不侵。

「你試一啖先啦,好好飲架!」Mike 說。
「頭先撈埋啲麵嘅時候我飲咗喇。」我說。
「淨飲湯呀,我想你飲呀。」Mike 說。
「好啦,我怕咗你喇,不如你唔好再迫我飲味精湯,我都唔再迫你唔準飲啦。」我說。
「咁又唔得,我女友都係為我健康著想,嗱,你飲一啖啦,我就唔再飲。」Mike 說。
「好啦,一啖。」我說,然後成碗捧起倒落口。

其實拍拖唔係要改變另一半嘅生活習慣,而係嘗試互相遷就,當中係可以作出溫馨提示,但最後決定都係應該交返比對方,始終每個人嘅生活方式都唔同,正所謂勉強無幸福,共勉之。

 

facebook

啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *