國際關係研究9up化3 — 夭折嘅匈羅反奧同盟與抽水抽著火水嘅波蘭

國際關係研究9up化3 — 夭折嘅匈羅反奧同盟與抽水抽著火水嘅波蘭

八月廿日,响港島區有一次難得嘅大型遊行集會,唔單只有傳統鐵膽嘅飯民同左膠團體,仲有本土圈嘅組織(本土民主前線)參與,為嘅就係聲援被改判囚的學生領袖等16名示威者;呢次遊行响本土圈中不無爭議,主要有兩點:

1. 照舊和理非非、照舊做唔倒嘢

2. 老飯民對一班無名抗爭者始終冷淡

集會講臺上,本民前嘅梁天琦為一班無名抗爭者呼號並提出「香港命運共同體」概念:「但我相信佢哋嘅付出唔係為左搞散運動,佢哋唔係鬼,佢哋係香港命運共同體嘅一分子。只要呢個共同體有人受到迫害,就係我受到迫害;只要有人受苦,就係我受苦。我就要走出黎反抗呢一切,為佢哋發聲。」

以筆者離地嘅理解,就係一班無權勢、弱勢嘅一群面對強權打壓時,應無分彼此、不計較立場同多年恩怨,團結埋一齊互相照應、互相聲援,以求共渡難關;以下想分享兩個歷史故事,睇吓歷史點樣笑尻我哋。

匈、羅反奧同盟

早响十九世紀中期嘅革命狂潮之中,面對實力強大嘅奧地利軍隊(連出名好打嘅普魯士軍隊亦忌佢三分),同樣想擺脫奧地利統治嘅匈牙利人同特蘭紹凡尼亞Transilvania地區嘅羅馬尼亞人就已經展開各自針對奧地利嘅勇武抗爭;當時匈軍聲勢甚強,一度攻近維也納,後來奧軍反攻攻下匈牙利首都布達佩斯,但旋即被匈軍所逐。

匈牙利始終抗拒同Transilvania地區嘅羅馬尼亞人合作;原來當中有一個歷史因素:就係當年匈牙利被劃入奧地利帝國領土時,係連同Transilvania一齊劃入,因為Transilvania嘅主要民族係羅馬尼亞人,但又長期被匈牙利統治,匈牙利人就一直視Transilvania係傳統匈牙利王國領土、視羅馬尼亞人為二等公民(類似中國人點睇香港同香港人咁啦),所以一直唔想同羅馬尼亞人合作(匈羅反奧同盟最初係由羅方首先提出)仲一直壓制羅馬尼亞人嘅民族主義運動;好喇,大家一直拉拉扯扯到傾掂數喇都嫌太遲,因為奧軍成功爭取俄軍支援,俄軍兵分兩路擊殺匈軍,其中一路就係經Transilvania,如是者,無論係匈獨定羅獨都全部收皮,匈羅反奧同盟亦告夭折。

匈、羅反奧同盟雖然夭折收場,但筆者認為依然不失為日後東歐弱小國家結盟共抗強權嘅先聲;其中羅馬尼亞方面最深明大義,知道奧軍大把籌碼玩,應該爭取同匈牙利人結盟,共同爭取各自民族獨立,早日逼奧方立城下之盟,等生米煮成熟飯就唔輪到其他列強說三道四;可惜匈牙利人太方丈、太自信,到第一次世界大戰後仍然最終失去Transilvania。

抽水抽著火水嘅波蘭

第一次世界大戰後,隨著4大帝國:沙俄、德意志、奧圖曼(土耳其)同奧匈帝國瓦解,歐陸出現一批「新」國家;其中作為一戰贏家一方嘅捷克斯洛伐克、南斯拉夫、羅馬尼亞為咗維護得之不易嘅建國成果、並考慮到各自實力不足嘅問題,所以結成「小協約國」以應對匈牙利、哈布斯堡皇朝後人或任何其他大國嘅可能威脅。

人人都話反對強權,唔通人人都凡係強權就反對咩?小協約國同波蘭對強權亦非全部抗拒,佢哋一向同法國相互支持:雙方都視對方為牽制德、意、蘇俄嘅好幫手;小協約國响對抗匈牙利、哈布斯堡皇朝後人方面發揮理想;响納粹德國出現初期,由於法國外長路易.巴都 Louis Barthou 同蘇聯外長 Макси́м Макси́мович Литви́нов 李維諾夫堅持反對法西斯威脅,小協約國亦能繼續發揮牽制德、意嘅作用。

但隨著1934年馬賽刺殺案發生,Barthou 同南斯拉夫國王Александар I Карађорђевић 亞歷山大一世遇刺身亡,法國綏靖勢力開始擡頭,縱容意大利一如英國縱容德國、美帝縱容日本,令小協約國同蘇聯外交決策陣腳大亂;最終由於法英臨陣縮手、拒絕同蘇聯依約軍援捷克斯洛伐克,後者慘遭德國、匈牙利肢解,小協約國就此瓦解。最可恥嘅係波蘭作為法國盟友,不顧道義、不看全局、只圖眼前蠅頭小利而參與肢解捷克斯洛伐克(波蘭分得Těšín),更脅逼羅馬尼亞不得為可能援捷嘅蘇軍給予過境權;後來德國成功自立陶宛手上奪取Klaipėda,將侵略矛頭指向波蘭,波蘭終於感受到亡捷之後唇亡齒寒嘅恐怖,真係抽水抽著火水。

強權壓迫係必須予以有力抗擊,而唔係姑息綏靖或向受打壓嘅一方抽水或向為受打壓一方發聲嘅人施壓;如果當初捷克斯洛伐克出事時,波蘭有啲大局觀(認識到自己同捷克斯洛伐克一樣係斯拉夫民族「命運共同體」遲早會被德國攪尻)唔向捷克斯洛伐克抽水而企响捷克斯洛伐克一方,結合法、蘇、波蘭同小協約國實力足以阻止德國侵略,波蘭就無需遇上日後嘅不幸。

「歷史沒有如果、只有教訓」

當大家都被強權壓迫時,其實老飯民係咪應該放下對年青人或本土圈嘅成見,响支援自己派系嘅抗爭者嘅同時,都應該對本土圈嘅無名抗爭者加以聲援同幫助?如果等強權一方充份動員其執法同司法系統聯合打壓時,將全部異見人士一網打盡,係咪到時先嚟後悔?呢個係匈牙利當年拒絕同羅馬尼亞合作反奧嘅教訓。

小協約國瓦解、波蘭因抽水而招致敗亡嘅故事,對我哋呢班香港人,無論係本土圈、熱狗青城、飯民左膠甚至建制派都同樣係一大教訓:無論你係咩派都好,你一日係香港人就係香港人嘅「命運共同體」:「沒有(香港)人是孤島、喪鐘為你我而敲」;你當日扮本土,今日抽唔係自己派系嘅被壓迫者嘅水,你最終會變成波蘭;你今日係飯民左膠,對無名抗爭者冷淡,你咪變咗做波蘭;你今日係投共建制派,但你始終係香港人,所謂兔死狗烹,你最終都係會變成波蘭、被清算批鬥,最終身敗名裂、死於恥辱同懊悔之中。

當然,你今日係本土圈,但只要有人被政權打壓而身陷牢獄,即使受害嘅係飯民左膠,都係保持哀矜勿喜、物傷其類嘅心情為彼等及其他無名抗爭者發聲呼號吧。

啱睇就Like埋我地個Facebook專頁

Leave a Comment

Your email address will not be published. Required fields are marked *