女人淨係靠件戰衣係無用架

女人淨係靠件戰衣係無用架

「Brenda!點解你今日著到咁靚嘅!你去邊呀?」男經理 Ryan 問。
「我今晚約咗人飲嘢,呢件係我一千零一件戰衣嚟。」我尷尬地說。
「去邊度飲呀?」Ryan 問。
「Magnum。」我說。
「吓,乜你都會落 Club 嘅咩?」Ryan 驚訝地問。
「我第一次落去咋,未去過咪去睇吓囉。」我說。
「小心啲喎,使唔使哥哥陪呀?」Ryan 說。
「唔使喇哈哈,仲細咩。」我說。

話明戰衣,點都要形容下畀大家知係點,我真心覺得條裙係唔錯,雖然只係喺 H&M 買,係一條黑色嘅背心連身裙,長度到膝頭哥上面,上窄下有少少散開,最堅係胸對上嘅都係黑色 see through,當中有啲黑色圓波波,若隱若現,似有嘢望其實又望唔到嘢咁款,個 style 係成熟得嚟又有啲 cute,堅係一條好有心計嘅裙嚟。

嗰陣我同阿 Mike 仲係同事,所以佢都聽到我同 Ryan 嘅對話,自從嗰日起,佢對我就開始越來越主動,可能係佢無諗到一個平時睇落純到爆嘅女同事竟然無啦啦會走去落 club,再唔主動啲可能真係隨時會畀隻狼咬走咗。無幾耐喺機緣巧合之下我哋放工就兩個一齊去食晚飯,勉強都叫做第一次約會,佢即刻問我嗰晚落 Club 嘅情況,仲好惡咁鬧咗我一餐,佢話:「未去過就想去睇吓,咁你未食過毒品係咪又想去食吓?有啲嘢試一次就死人!」

我當時真係心諗乜事呀呢條友無啦啦咁惡鬧我,你又唔係我邊個,但係同時間我又諗,點解佢好似咁緊張我嘅?之後嘅事大家有興趣我先再詳細寫啦下,總之後來我就同阿 Mike 一齊咗,然後件戰衣就被迫打咗入冷宮,幾年嚟就只係著過嗰一次咁大把,真係好可惜。其實我之後仲買咗幾件好靚嘅戰衣,但唔係封塵就係送畀人,因為我已經肥到著唔落,你知啦戰衣呢家嘢,肥少少著都死,我寧願著返普通 Tee,所謂獻醜不如藏拙。

「我好想著返嗰件戰衣呀,嗚嗚。」我說,其實我久唔久就會諗起件戰衣,諗起以前瘦版嘅自己。
「你有我,仲使乜著戰衣。」Mike 若無其事地說。
「你都唔明嘅,女人有時都想扮靚架嘛!我而家咁肥,著唔返喇。」我說。
「哦,咁你帶嚟我屋企著囉,我都唔覺得你肥。」Mike 說。
「無嘢喇。」我說。

女人就算有戰衣其實都係無用,最緊要反而係 keep 住個身型,所以我最近都好努力咁去做運動,一星期三次,希望可以瘦返少少,著返啲靚衫,因為好多衫睇落好靚,但一試上身就好核突,成個肚突出嚟分分鐘人哋以為我有咗,然後試咗幾件都 fail 之後個人就會好頹,連衫都唔想再睇,雖然無形中係慳咗錢。唉,我真係好耐無扮靚喇,所以小妹現向大家跪求減肥大法。

 

facebook

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *