如果有錢,我一定包起我男朋友!

如果有錢,我一定包起我男朋友!

「你幾時辭職?」我說。
「遲啲啦,都未儲夠錢。」男友 Mike 說。
「錢可以慢慢儲,但係你而家晚晚 OT 到咁夜真係唔掂。」我認真地說。
「知喇,過埋呢個星期會好啲。」Mike 說。
「呢句說話我已經聽過十九幾萬次,根本無一次係真,只有越來越過份。」我說。

話說阿 Mike 諗住儲多啲錢同我結婚、買樓,組織小家庭,所以佢就轉咗去而家呢間公司度做,人工當然高啲,但係比以前辛苦一百倍,其實以前都已經好辛苦。有幾辛苦?就係連續成個月每日都瘋狂 OT,有時甚至 OT 到凌晨,就算唔凌晨都成 11、12 點,仲要係未食飯架喎!公司根本就係唔夠人,仲要不停接 job,senior 辭職就走去請個 junior 返嚟頂就算,甚至唔請,慳皮到死,冒求 chur 到所有員工氣絕身亡為止。

我真係唔明點解可以有啲咁無人性嘅公司,簡直係收買人命!有乜可能要啲員工日日加班到咁夜,仲要無補水!話就話人工高過以前,除返開時薪分分鐘仲少。有時星期六日又可能要返工,雖則話比 1.5 倍人工,但係你以為 1.5 倍好很多呀?比到2倍都唔應該返囉,唔使休息㗎你估?機械人呀?老老實實,做嘢真係會做死人,捱壞咗身子亦好唔抵,我真係驚佢未娶我已經捱到死咗 (touch wood)。

邊有腦細可以咁刻薄㗎,阿 Mike 又係,其實做唔切咪直接同腦細講做唔切囉,手就得一對,雖然我明昏有時真係好難對抗腦細,尤其係當你真係好需要呢份工嘅時候。佢仲話:「其實呢度已經算幾好㗎喇,都會 appreciate 我嘅努力,話我做得好。」Come on!你有睇我本書應該都知道「我唔想你讚我我淨係想加人工」呀!(直入式廣告,有位無理由唔入)無錯佢腦細之後都真係有加到佢人工,之但係人工加 10%,工時加 100% 囉!

我真係好想鬧爆個腦細,有無人性架你?我衷心希望你第時個仔個女都係咁樣畀無良公司虐待,然後一辭職就畀人話:「依家啲後生真係唔捱得。」(我好少咁咒人但我真係睇唔過眼)不過算啦,喺香港都係有錢人玩晒嘅地方,無錢?咪繼續做奴隸,頂多寫篇文鬧下呻下囉,仲可以做乜啫?

其實無錢咪唔擺酒,旅行結婚或者兩家人食餐飯囉,無錢咪唔買樓,租樓囉,真係唔想見到另一半咁辛苦去捱。我當然知道可能身為一個男人,真係會想努力搵多啲錢,令伴侶有一個更好嘅生活,但係咁樣真係太辛苦。我真係好想佢快啲辭職,但係每次同佢講親都轉開話題。我唔係嬲佢,我只係心痛佢,如果有錢,我一定會包起佢!雖然我知道就算我有錢佢都唔制,加上我都無咁多錢。唉,聽日買番張六合彩先。

 

facebook

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *