無下次的機場太興叉燒飯

無下次的機場太興叉燒飯

返到香港全家都好肚餓,之前食咗咁多日西餐,大B話掛住叉燒飯,就求其衝入抵港大堂嗰間太興。

嗰個鋪位以前係美心,幾乎每年暑假落機都會去食(又係叉燒飯),都無咩特別,但今次太興呢碟伏到我講粗口。

嗰幾舊叉燒呢,基本上無乜肉,係全肥膏,而且似煲熟多過燒熟,老公話可以直接當豬餿無誤,結果乾啃白飯算數。

機場可以話係面向外國遊客的第一度門,人地一場嚟到,你竟然畀豬餿人地食。臨上機嗰餐響彼邦食,人地個三文治即叫即造,新鮮又足料,我開開心心全份食曬至講bye bye上機,你話我崇洋都好,感覺真係差好遠囉。

加上一返到嚟就鼻敏感歸位(我個女都發現自己全個假期無病到——平時響香港係經常流鼻水打乞痴),一落地又遇到水貨客阻路,等等等等。

我好感慨,香港明明係我屋企,但點解年年夏天度假返香港嗰下越來越似行刑,就連我個女都話唔想返香港。佢個原因比較簡單,因為返香港即係要返學做功課。我用語言偽術安慰佢話,咁外國小朋友到咗九月都要開學架啦。而她不知道的是,人地每日12點就放學,暑假放三個月,無暑期作業,唔使補充練習無間做。唉。

我做咗十幾個鐘頭空中人肉枕頭(兩個細路分別霸佔我條左髀同右髀)同埋廁所宅急便(不斷將兩個細路送去機上洗手間),雖然對住碟肥膏飯好嬲,但已經攰到無心情同啲職員理論。立此存照,下次記得唔好再去食。

(講多次:圖係來自Wikipedia,唔係我食嗰碟)

#點解食碟叉燒飯都要咁嬲
#中二病又發作
#越來越唔想做香港人
#點解香港變成咁
#說好的美食天堂呢
#定係貴價才天堂平價就地獄呢

啱睇就Like埋我地個Facebook專頁
山地媽,八十後,香港人,愛冒險。曾旅歐四年,邊讀邊玩邊打工,見盡奇人,做盡怪事。現為家庭主婦,兩兒之母。以為全職湊仔很平淡,殊不知原來又是一場冒險之旅。

Leave a Comment

Your email address will not be published. Required fields are marked *