男人都係口裡說不,身體卻很誠實

男人都係口裡說不,身體卻很誠實

「初初睇陳凱琳都覺得佢幾靚,但係而家個樣好似越睇越怪。」我邊揭八卦雜誌邊說。
「係囉,好怪,都唔靚嘅。」男友Mike說。

然後無幾耐佢就send咗佢同陳凱琳嘅合照畀我睇,事緣係佢公司咁啱搵咗佢拍嘢,所以有機會集郵,話晒都係明星,如果換轉係我,我都會影,好正常啫。過咗幾日我哋一齊出街食飯,唔知點解佢又講起張相。

「嗰日我話想同佢影相,跟住即刻個個都爭住影。」Mike說。
「下?即係你係第一個主動話想同佢影相?我以為係人人都影所以你先順便影埋一份。」我說,然後心諗之前你又話人哋個樣怪,假到死,然後即時幻想埋佢當時變成喉禽狗公/宅男怕醜嘅樣。
「係呀,我特登影畀我女朋友睇咋嘛。」Mike說,佢竟然仲想兜喎。
「Bull shit!你自己覺得人哋靚女想影就影啦,賴咩話影畀我睇,我要睇上網大把有得睇啦,藉口。」我說,本身明明無事,無啦啦又會辣㷫咗。
「你之前夠同阿人魚線影相啦,佢只不過係model仔咋嘛,我呢個起碼係港姐吖。」Mike說,無啦啦佢都㷫埋,連幾年前嘅事都摷返出嚟講。
「跟本唔關出唔出名事,我鍾意佢咪影,成龍夠出名啦,你會唔會同佢影相吖?」我說。

講到尾,其實影相咪影相囉,同明星影相幾咁閒,但係可唔可以唔好撻女朋友出嚟做藉口先,好假呀,如果我同人魚線影完相然後send畀你同你講:「我特登影畀你睇㗎。」你會點諗先?你咪又係話我拎嚟串你叫你練大隻啲,超!當然,事後我真係有嘗試抽身以第3者身份去睇呢件事,如果阿Mike直接咁答我:「嘩,大佬,佢咁索,我梗係仆到去同佢影相啦!仲等咩呀!」我又會唔會真係完全唔呷醋呢?諗諗下,其實做男人真係幾慘,坦白又死,唔坦白又死。

男人對住樣靚身材正嘅女人可能會不禁變咗狗公,搖頭擺尾咁,但係講句公道說話,女人對住啲高大有型靚仔又大隻嘅韓星咪又係一樣發晒姣心心眼咁樣係咁叫 oppa?嗱,一係咁,我唔介意你同索女影相,你都唔好介意我同型男影相喇,公平啦喂。

image: TVB
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *