當 stakk 都做唔住,你仲有咩娛樂可揀?

當 stakk 都做唔住,你仲有咩娛樂可揀?

事實證明,就算李澤楷咁有錢,都唔會提供到免費既娛樂平台。
由TVB年代開始,我地就習慣咗扭開電視機就有免費電視睇。
到咗電視開始走下坡,大家又走去網上,尋找免費既娛樂(小說,文章,youtube)。
我地都覺得資訊係免費既,娛樂係免費既,文字係免費既。係我地大量接收緊呢啲「免費」野既同時,我地都無諗過,點解有人咁笨去做免費既好野俾你?
真係咁大隻蛤乸隨街跳?我地為咗得到呢啲「免費」既野,到底付出咗啲咩?

其中最明顯一定係質素,免費意味住無監管,無成本既野大家都做到,咁仲有邊個去做好?
無必要去做好,因為反正免費既,無人有資格去監測內容產生者既品質。
你又冇俾錢佢,你憑咩要佢做好啲?

結果網上充斥住大量既內容農場,標題黨,垃圾廣告,同政治打手。
點解而家所有既娛樂平台都充斥住啲我地唔需要既內容?因為我地選擇免費,結果貪字得個貧。
免費野其實最貴。無人會無目的咁提供好既娛樂。
點解要免費?佢既然唔收你錢,咁佢收邊個錢?一係就收廣告商既錢,一係就有政治立場需要呢個平台去發聲所以俾錢去支持佢既營運。

香港人如果仲想保有自己既娛樂,就要學習俾錢買番屬於自己既娛樂。
無論係好既節目,好既作者,好既youtuber,你要記住,你唔俾錢令到你鐘意既作者生存到,最終佢就只能走去向大財團收錢,咁到時佢就係為大財團服務,唔再係寫野俾你睇。
你鐘唔鐘意唔再係佢既第一考慮因素,俾錢佢既人先係直接決定咗佢生死,佢就會去迎合俾錢佢既廣告商既口味,寫啲你唔想睇既野。

反正你要睇文,反正你要娛樂,反正你最後都係要俾錢(你唔俾錢廣告商佢邊有錢拍廣告。),咁點解你唔直接俾錢支持個作者,起碼個作者生存落去繼續寫文,可以寫啲你鐘意睇既野。
讀者決定咗呢個世界有啲咩作者,你地養起一班咩作者,係由你地決定。讀者要攞番屬於你地既主動權。
你鐘意呢個作者,你想繼續睇到呢個作者寫落去,你其實有義務去保護呢個作者。
唔洗好多錢,假設個作者有一千個支持者,如果每個讀者一個月俾$10去支持個作者既生計(一杯咖啡都唔洗既價錢),佢就已經足夠生存落去。
咁佢就唔洗每日都諗點樣賣廣告,唔洗諗點樣起個標題呃like,而可以專注提供更好既娛樂。
因為你地俾錢直接支持緊一個作者,到時你地先係掌握作者生殺大權既人,個時你地想要好既文章,作者自然會想盡辦法去提供好既文章。
小心輕看(www.facebook.com/hkreadwithcare)就係一個咁既平台,由讀者訂閱去支持作者既產出,每一篇文都係直接跳過中介,向讀者負責。
建立良好既風氣,使香港都可以做到文字有價。讀者同作者有一個更加直接交流既關係,用讀者手上既錢真實咁反映對每一個作者既支持。
支持除咗講一句我支持你之外,我地仲可以做咩?
唔通就只可以等stakk炒曬啲主持既時候,就走去留言話:「我好鐘意睇你拍片架!」,與其淨係用把口悼念已經失去的,小心輕看情願落手落腳去保護仲努力生存既文手。
等佢地可以自由咁創作,去為佢地既讀者提供優質既娛樂。

我知道,香港而家無呢個風氣,要讀者俾錢唔容易,呢個係一場豪賭。
但如果小心輕看要生存到,就只有呢一條路,必須要相信讀者,同時相信作者。我有咁既信心,我希望大家同我地一齊成就呢件事。

訂閱方法 https://goo.gl/forms/EtCaF1t2ZGjgWj812

 

Photo: 小心輕看 Facebook

啱睇就Like埋我地個Facebook專頁

柳臣 一個喜歡寫作的香港人
能創作就是幸福於是我開始了我的幸福之旅

Leave a Comment

Your email address will not be published. Required fields are marked *