女人其實真係幾恐怖

女人其實真係幾恐怖

話說未識阿Mike之前,即係我單身嘅時候,久唔久都會去識下新朋友,然後成班人一齊去玩去食好西,所以都見識過好多唔同類型嘅女人,有啲就成個傻大姐咁,講嘢唔係好經大腦但心地善良,有啲就弱質纖纖,好似打風都會吹走咁,叫佢拎少少嘢都會叫晒救命,有啲就細細粒好得意,表面天真無邪,但其實腹黑都爆,當然唔少得嘅係女神級別,面尖尖白白淨但cool cool哋嗰啲。

我屬於邊種?當然係平平凡凡,一個招牌跌落嚟砸死幾件嗰種啦,不過我都有個優點嘅,就係笑點低,乜都笑一餐,好易相處,所以同大部份人都friend到。其實我都唔算大殺傷力,但可能因為防禦力低,即係畀人恰到上心口都唔識反抗嗰種,所以成日都畀人拎嚟開刀。唔知點解有啲女人梗係鍾意扮無力,去BBQ就最明顯,你知啦女校出身慣咗乜都自己嚟,就算唔拎炭,我都會幫手拎下嘢飲。

「嘩!你好大力呀!啲嘢飲咁重都拎到!好勁呀!」女人A說。我心諗有幾重呀頂你,扮晒嘢,食屎啦你。
「係囉,我哋淨係可以拎零食㗎咋,薯片棉花糖嗰啲。」女人B說。
「喂,使唔使幫手?」男人A說。
「唔使喇,你幫其他人啦。」我說,其實我都可以扮,不過真係扮唔出,所以咪又輸蝕咗囉,男人都鍾意幫弱者。

除咗扮無力,有啲女人都好鍾意展現佢賢良淑德嘅一面。話說雖然我本身懶底,但如果成班朋友一齊去飲茶,個膠兜同壺茶又咁啱擺喺我面前,我都會主動幫手倒茶洗下啲杯杯碗碗,點知我一隻都未洗完就有個女仔爭住嚟洗。

「等我嚟啦,你都唔識洗嘅,姐手姐腳咁!」女人A說。
「好呀。」我說,超!你咁鍾意洗你咪洗飽佢,我唔會阻你。
「睇你平時都唔會幫手做家務㗎喇,煮嘢呢,你識煮咩㗎?」女人B說。
「我好少煮嘢,頂多都係煲蕃茄薯仔湯,夠簡單,咩都掉晒落去。」我說。
「哦,即係毫無技巧可言嗰啲,我平時好鍾意煮嘢食㗎,咕嚕肉呀,西檸雞嗰啲。」女人A得戚地說。

對住一班新識嘅朋友,都係希望開開心心去玩下啫,雖然當中都會留意下有無啱嘅對像,但都唔使好似搞到選港姐咁掛,才藝表演咩而家。我就唔信你識做家務識煮飯就搵到男朋友,而家係搵女朋友唔係搵工人呀喂!其實佢哋鍾意串我,踩我而抬高自己都唔緊要,最恐怖嘅係佢哋有時又會表現到好關心我,同我攬頭攬頸,然後同其他人講我係佢哋好姊妹,天啊,好亂呀,你哋究竟想點呀?

可能真係your face, your fate啦,即使佢哋表現到非常賢良淑德,識嗲人,扮弱者,但都係無乜效,我仲留意到其實佢哋每次show off嘅時候大家都係鴉雀無聲,其實做返自己,自自然然咪幾好囉。

小盛女

image : huffpost

啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *