男友每次都話:「我今晚絕對唔會加班!」

男友每次都話:「我今晚絕對唔會加班!」

「我今日絕對唔會加班!」呢句說話我聽過幾多次呢?已經多到我數唔出,咁耐以嚟,呢個承諾一次都無兌現過,係一次都無。而我就好似狼來了入面嘅村民咁,就算畀人呃過十九幾萬次,當聽到呢句「我今日絕對唔會加班!」我仍然會好傻咁仆去我男朋友公司附近等佢,諗起都覺得自己好傻仔。

等待嘅時候做乜好?有時行街,有時齋坐,有時寫嘢,但係放咗工其實已經好鬼攰,又周身骨痛(主要係肩頸痛再引致頭痛),原來我想同佢安安樂樂食餐飯都咁難,有時唔係話唔想拍拖,唔想見另一半,而係無了期咁等真係令人太難受,一粒鐘、兩粒鐘,究竟仲要等到幾時?我有幾次等等下都好想返屋企算鬼數,但係我又始終唔甘心,覺得等咗咁耐點都要等落去,就好似買股票咁,就算一路蝕,只要我一直唔放,我都未算輸。

等固然苦悶,等到肚餓仲慘,點解我唔食嘢先?因為真係會等到無胃口食,我係肚餓,但我真係食唔落,然後肚餓就自然會燥底,燥底就好容易鬧交,傷感情。每次等完粒幾鐘我都同自己講下次千其千其唔好再信佢,然後過一、兩個星期,事件又再重覆,真係自己攞嚟賤。

份工緊要啲定我緊要啲?我有時都會諗埋一邊,短暫性輸咗畀呢個小三(工作),覺得自己好蠢,好憎自己點解仲要信佢話唔加班就唔加班,明明次次都失言,然後同一時間我又會同自己講,佢已經好辛苦㗎喇做嘢咁忙,唔好嬲佢啦,要體諒,要大方,簡直係人格分裂。我開始憎自己,一個人最辛苦就係連自己都唔鍾意自己。

可能你覺得另一半要加班,等埋一齊食飯好正常啫,咁小事就嘈生晒,但係積小成多,儲埋儲埋小事都會變大事。你選擇咗做呢份工,為咗賺多啲錢同我結婚買樓,但係當你賺到錢嘅時候,當中又已經犧牲咗幾多?其實錢係搵極都唔會夠,無錢咪唔去旅行,無錢咪唔食好西,無錢唔會死。

「我返屋企先喇,你慢慢做。」我說,都已經等咗一個鐘。
「就走就走。」Mike 說。
「你每次話就走都要半個鐘以上。」我說,最後我都等多半個鐘。

「我決定平日以後都唔再嚟接你收工。」我說。
「你唔好嬲啦,我都唔想咁遲走,咁啱又有嘢 urgent 要改。」Mike 說。
「其實我已經無再嬲你,既然我改變唔到你,你又改變唔到公司,咁我唯有改變我自己。」我說。
「點解你要咁做?」Mike 說。
「我嚟接你,一嚟嘥大家時間,二嚟容易鬧交,最重要係只會令我對你越來越失望,而你,亦只會覺得我呢個女朋友唔識體諒你,根本係百害而無一利。」我說,然後換嚟一片沉默。

工作同愛情,真係要二選一?

 

facebook

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *