人比人,比死人呀喂!

人比人,比死人呀喂!

話說今日喺中環食完lunch,見有啲時間就同同事周圍行,行行下發現迎面而嚟嘅係我一個大學同學,佢著住一條連身花邊喱士短裙,身材好,化晒妝,滿口英文,同隔離貌似係佢腦細嘅鬼佬喺度傾緊計,可能佢無見到我,或者扮見我唔到,所以招呼都無打,就咁擦身而過。

我即時望返自己,淨色衫加條淨色及膝裙,無化妝,戴住個黑框眼鏡,烚下烚下咁,至於工作上呢,做咗幾年嘢都仲係marketing打雜一名,無乜大進步,又唔算係好有事業心,但求日日準時收工放工,養到自己,夠食夠用就滿足,好似好頹。廿幾歲人唔係應該充滿拼搏精神嘅咩?點解我個心態好似等退休咁款?話晒大家都係讀同一科,點解人哋企出嚟咁professional,我就仲係成個二打六咁。

「喂,有無見到頭先個女仔條連身裙呀?」同事Macy說。

「有,成條都係喱士㗎嘛,仲好緊身添。」同事Kate說。

「Er…其實呢,佢係我大學同學嚟。」我尷尬地說。

「吓!唔似喎!」Macy說,其實我都知自己同佢差一大截,總之唔講出嚟話識佢。

「係囉真係唔似喎,佢睇落老咁多嘅!」Kate說。

「吓?」我驚訝地說,真心完全無諗過佢哋係講呢啲,仲以為係想話我頹。

「仲有佢條裙好唔掂囉,隻色好老土。」Macy說。

「哈哈,又係喎。」我笑說。

自卑,係人都會,特別係面對一啲比自己叻嘅人,平時可能無乜嘢,但係當另嗰個人出現嘅時候就會突然有比較,覺得自己好唔掂,將缺點無限放大,優點盡情縮小,一秒即頹。可能你話:「人比人,比死人,做咩要同人比啫?」講就易,但又有幾多個真係可以完全唔計較先?其實每個人都有佢叻嘅地方,有人語文叻,有人音樂叻,有人運動叻,最緊要係識得發掘自己叻嘅地方,同埋欣賞自己。

講到尾,只有自己先可以定義自己,其他人講嘅嘢,咪當去睇相咁囉,好嘅就靈,唔好嘅就唔靈。

啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *