做打工仔千其唔好寵壞你老闆

做打工仔千其唔好寵壞你老闆

「Brenda,唔好意思呀放咗工仲打畀你,阻住你拍拖添,不過有樣嘢 urgent 想你幫幫手。」老闆 Rex 說。
「唔緊要,咩事?」我說,唔通我收你線咩老闆。
「我有個 title board 想你試下邊隻字體會好啲。」Rex 說。
「你想幾時要?因為我而家喺街呀……」我說。
「ASAP 啦,你 whatsapp 我得架喇……」Rex 說。
「OK!」我說,頂,即係即時做啦。

其實我放工之後係趕住去做 facial,接電話嘅時候已經到美容院樓下,我唯有拿拿臨上網搵啲字體畀佢睇,點知搵極佢都唔啱心水,佢又打電話嚟又不停 whatsapp 我,搞到我面都洗唔到,個經理同時間又係咁 sell 我做個貴啲嘅f acial,真係燥到噴火。最後我就一路做 facial 一路覆 message,簡直人都癲,到美容師要倒膜我先停手。其實放工去美容院都係想去放鬆下,而家白白浪費晒,連心情都差埋。

搞咗一大輪,最後老闆都係無覆我究竟想用邊種字款,話聽日再搵,我頂!咁你唔好話 urgent 同 ASAP 啦!我放咗工架大佬!你知唔知你簡單一句就會搞到我好精神緊張?自從嗰次之後,老闆事無大小都會搵我,搵圖呀,淘寶呀,寫 post 呀,好多時都係喺我放咗工或者放緊假嘅時候,有時我同朋友食緊飯佢打嚟,真係一秒即頹。後來我發現佢越來越得寸進尺,可能係因為次次我都即時做畀佢,所以我覺得係時候要反抗。

反抗第一步係就算我即時做好咗,我都唔會話畀佢知,等到第二日返工先覆佢;第二步係直情第二日 office hour 先做;第三步係扮聽唔到佢電話,震機聽唔到好正常啫。雖然老闆係最大,但係都唔可以太過份囉,我唔係你二十四小時私人秘書呀,而且我人工係唔包呢啲,現實啲都係咁講。

雖然唔應該寵壞老闆,但老闆始終係老闆,總唔可以次次都 say no,除非搏炒,不過佢平時都算對我都好好,所以久唔久一次我又得閒嘅話其實都會幫佢,你對我好,我對你好嘅啫,其實打工仔真係好簡單,與其對我好,不如加我人工仲實制啦,我唔想你讚我,我淨係想加人工呀!

 

facebook

啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *