十二點前瞓真係一個好難嘅任務

十二點前瞓真係一個好難嘅任務

「幾點呀而家!你仲唔瞓?」媽媽生氣地說。
「你估我想夜瞓㗎?公司加班我都唔想架!」我說,放工其實真係好攰,又唔夠瞓,所以個人真係好燥底。
「咁你咁夜收工就唔好再玩電腦啦,你知唔知咁樣好傷身架!」媽媽說。
「咁我都要放鬆下,得啦,你唔好理我啦。」我說。
「咁後生就捱到咁,幾時捱到老呀你?」媽媽說,我無再應佢。

記得幾年前我仲係做緊 agency,加班係每日都會發生嘅事,一星期都唔知有無兩日可以返到屋企食飯,通常都係喺公司買飯盒食,食完又再做,星期六日就出 event,有時趕起上嚟連續幾晚加班到凌晨三、四點都試過。除此之外,24 小時啲客都會 whatsapp 你,真係人都癲,最慘係咁辛苦人工都係唔會高,因為嗰陣仲係畢咗業無耐,無乜工作經驗,亦無議價嘅能力,有人請已經係謝天謝地。

我阿媽平時好少鬧我,但嗰排佢成日都鬧我,因為我太夜瞓,我初初覺得好煩,因為返工已經夠辛苦,平時受腦細氣受客氣返到嚟仲要畀佢話,我真係寧願夜啲返等佢瞓咗鬧唔到我。有時返到屋企已經十二點,但係我仲會開電腦寫文,因為返工實在太大壓力,好想寫出嚟呻下抒發下。其實我點會唔知阿媽係怕我捱壞先鬧我,只不過當時真係「人在江湖,身不由己」啫。

捱咗一段時間之後我就轉咗 in-house marketing,而家都會加班,但大部分時間都係七點前收工,我終於過返啲正常人嘅生活,我屋企人都安心好多。雖然魚唔過塘唔肥,但係暫時都唔想轉工住,因為懶得去重新適應一個新嘅工作環境同同事,至少我而家放工可以返屋企食飯,可以去學跳舞,可以去做 facial,夜晚十二點前就可以瞓。

「你琴晚幾點瞓?」我說。
「五點。」男友 Mike 說。
「吓!有無搞錯呀,我叫咗你返到去即刻沖涼瞓架!」我說。
「我睇咗套戲呀嘻嘻。」Mike 說。
「你已經連續成個星期都四、五點先瞓,加班就無得好講啦,琴日放假你都咁夜瞓?點解你咁唔錫身架!」我生氣地說。
「咁我都要放鬆下,得啦,你唔好理我啦。」Mike 說。

唉,我終於都深深明白我媽以前鬧我嘅心情了。

 

Photo: Flickr user larsjuh

facebook

啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *