夢之謎

夢之謎

之前睇中醫,話最好十一點前瞓,基本上係無可能,可以十二點前瞓已經好好,可惜唔知點解最近呢兩晚都失眠,平時我好少會咁樣,碌嚟碌去都瞓唔著真係好慘。其實近呢幾個月都晚晚發好多夢,搞到瞓極都好攰,有人話多夢係因為瞓覺前玩手機,又有人話係因為枕頭唔啱,最多人話係精神緊張,咁我唯有今晚瞓覺前試下睇書同拉根放鬆下睇下會唔會好啲。

講開發夢,我成日都會夢見自己甩晒啲牙,一係就畀人望住我去廁所、跌落深淵(會有一下離心嚇到醒咗)、食自助餐(次次都係夾勁多嘢食但未食就醒咗)、被人/怪獸追殺等等,都唔係啲咩好夢,我上網查過,話係因為壓力大,但我又唔係好覺平時有啲咩事係好大壓力,可能係潛意識影響。

有人話放隻公仔喺床頭,你瞓著咗嘅時候佢就會守護你,趕走啲夢魔,所以我床頭都有隻粉屁桃,但當然係無用啦哈哈。有時又會發啲好唔開心嘅夢,例如係已故嘅親人,醒咗會發現眼角仲濕濕哋。有次發夢比人追殺,嚇到醒咗,但好快瞓返於是又入返同一個夢,之後又突然醒咗,我死都撐大對眼唔瞓住,因為唔想再入返個夢度。

「呢個情境我發夢夢過㗎!點解會咁嘅?」男友Mike突然驚訝地說。
「咁搞笑?不過其實我都試過咁樣,好神奇,究竟呢個係預知夢定叫夢境成真?」我說。
「我都唔知,其實原本我已經唔記得咗個夢,但係而家呢個畫面又令我諗返起。」Mike說。
「即係你命中註定要同我周圍食好西㗎喇哈哈!」我說。

好奇一問,其實大家又發過啲咩夢?

 

Photo: Medical Daily

 

啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *