為未來計劃係未雨綢謬,定係嘥_氣?

為未來計劃係未雨綢謬,定係嘥_氣?

「我一諗起結婚就好驚,有好多嘢要煩,邊度擺酒啦、請邊個啦,之後住邊啦。」我說。
「得啦,你乜都唔使搞,到時我搞晒。」男友Mike說。
「咁又唔得,你都唔知我想點搞。」我說。
「我又好驚生仔啦,會痛死啦,生出嚟無錢養又唔識教啦,I am not ready。」我說。
「婚都未結你真係唔使諗咁遠喎,生咗出嚟自然就養到㗎啦。」Mike說。

我就係乜都會驚餐死,而阿Mike就相反,覺得船到橋到自然直,或者我悲觀少少,我覺得船到橋頭係自然撞,所以成日都覺得好無安全感,好想為自己計劃一下。有啲人係會一早為自己定下好多計劃,例如愛情上會諗定自己幾多歲拍拖,幾多歲結婚生仔,工作上就諗定幾多年後升senior,跟住幾多年後再升assistant manager,甚至係manager,然後幾多年後就儲夠錢買樓組織小家庭。

計劃一定係美好,但實踐上嚟又係另一回事,就算而家諗好咗N個計劃,可能到最後係一個都用唔著,咁而家用咁多時間去諗去煩係咪嘥時間?好似以前去澳洲working holiday咁,我去之前做咗幾個月research,睇咗好多書,仲整咗幾疊notes,但係去到嗰邊係極少嘢用得返,因為計劃真係趕不上變化,原本諗住做嘢搵錢先,點知到頭來去咗食宿交換幾個月,然後之前搵嘅工作資料已經完全唔update,其實去到嗰邊,反而靠人先係最有用。

而家嘅我唔算係好有計劃嘅人,只係固定有儲錢,唔係無諗過幾時結婚生仔,不過好似做卧底咁,三年之後又三年囉。計劃永遠伴隨住變化,有時已經覺得唔到人去計劃,就算有儲錢又點,追到個癡晒線嘅樓價咩?就算已經好努力工作又點先?腦細唔升你就係唔升你。就算諗住三年後結婚又點,可能未都三年都已經畀人飛咗(touch wood),所以話諗咁多嚟做乜呢。

講到尾,其實我話做人最緊要及時行樂,開開心心咁過每一日同埋珍惜身邊愛你嘅人,因為除咗「計劃」同「變化」之外,呢個世界仲有樣嘢叫「意外」。

小盛女

image : marriage.com

啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *