邪惡 YLE

邪惡 YLE

大家都知道我好反對太細個的小朋友參加學術性的補習班/提升班/興趣班(明明係操英普數叫咩興趣班…),所以我對好多家長趨之若鶩的劍橋 YLE(即係少兒版IELTS)係得個知字,並無研究同深入了解。

今日係咁意Google下,綜合埋以前聽聞所得,唉,真係癲到呢。

話說 YLE分 starters movers flyers三級,本來係分別為5-6歲、6-8歲、8-12歲三個年齡層學童而設。問題係有直私響K2下學期已經面試,而且有啲細B到K3開學都未足5歲,所以考唔切YLE嚟砌 portfolio 報學校。香港BC(英國文化協會)當時好嚴格,未滿5歲不得報名。

有無解決辦法?有!深圳河以北啲試場係唔理你幾歲架,跳起yeah!所以有私幼安排過境旅巴成車K2雞送去鄰國考試。

後來香港 BC 從善如流(或曰肥水不流別人田),將年齡限制下調到4歲,自此小朋友就唔使受舟車勞頓之苦。(跳起yeah)(不過試都係要考的)

根據香港BC描述,最淺嗰級starters係為6歲或以下設計,即係話幼稚園雞考呢個level就最適合。(補充:睇台灣啲語文中心資料,其實呢級係建議7歲起報考…)之不過,要博入名校,人考starters我又考starters,又點顯得個細路勁?有baby condom老母報料話名幼啲K3仔已經越級考第三級flyers,即係小三至小六程度。

K3仔考高小野,大家覺得係個細路真係明定係囫圇吞棗呢?講到呢度我就諗起我留學時遇過嗰啲強國同學。

鄰國都有連鎖補習社,同學話補TOEFL IELTS最出名嗰間叫新東方。(當年係,而家唔知)考生為考高分可以好瘋狂,違規做法包括請槍、買答案(以前係考筆試,每月一份新題目,有請槍集團安排考手月頭去考咗嚟記問題,然後整理好答案賣畀考生,背咗嚟應試)。至於合法的做法,當然就係地獄式操練,實際點操作我就唔清楚,只聽過話係有本“托福詞庫”嚟背單詞。(……)

總之就係考出嚟幾乎滿分,但實際係唔識講英文或者講到1999。間中都有報導話留學生因為TOEFL成績造假而被踢出校。

IELTS TOEFL的出現係為咗方便英語國家學校衡量申請人的英語程度,正常嚟講過咗某個分數就叫做達標,而唔係鬥高分。呢啲試通常係高中準畢業生同本科準畢業生為報讀外國大學而考,即係話考之前已經學咗相當年份的英文(起碼以香港嚟講),斤両有幾多就幾多。

IELTS TOEFL原意就係咁,BC整一系列少兒版、青少年版IELTS出嚟(你以為考完flyers就完呀?跟住重有KET PET FCE CAE CPE 一條龍考上去),遇著香港怪獸家長就大件事。

無呢堆考試嗰陣好地地,推出呢堆考試就搞到班家長神經緊張,人考我唔考就好輸蝕,人考flyers我考movers好輸蝕,人考滿分15盾我得12盾又係好輸蝕(所以有細路係要同一個試考兩三次,考到老母滿意分數為止),結果三歲起就為IELTS(及其junior versions)而戰,真係細個補“Keep Clam”,大個補 Chok Lam。(長期讀者有食過呢包花生會明)

#燈塔補習社廣告
#反式嗰種

路過補習社見過啲盾盾證書,仔女讀的小學幼稚園都與時並進開YLE班,不過我暫時都係不為所動。學校一年咁多次考試測驗默書重嫌唔夠呀?語文能力呢家野係靠浸靠exposure,唔係靠考cert考出嚟,而家呢個玩法係完全本末倒置。當然好多老母會話人在江湖身不由己,咁你有你江湖,我有我大海,大家平行時空各有各生活啦下。

啱睇就Like埋我地個Facebook專頁

山地媽,八十後,香港人,愛冒險。曾旅歐四年,邊讀邊玩邊打工,見盡奇人,做盡怪事。現為家庭主婦,兩兒之母。以為全職湊仔很平淡,殊不知原來又是一場冒險之旅。

Leave a Comment

Your email address will not be published. Required fields are marked *