其實我只係想好好哋去個廁所啫!

其實我只係想好好哋去個廁所啫!

去廁所,基本上係每人每日都要做幾次嘅例行公事嚟,由於一日有八小時以上都係喺公司度過,所以公司有個乾淨企理嘅廁所真係好重要。雖然每日都有姐姐嚟公司清潔,但係好可惜呢個世界上實在有太多無公德心嘅人,加上公司每層只有一格廁所,所以我呢個地獄黑仔王仍然係成日會中招。

話說公司有個同事叫「廁王」,最鍾意入廁所玩手機hea晒啲時間唔做嘢,我當然知道廁所係打工仔放鬆兼偷懶嘅好地方,問題係一層得一格,你入去半個鍾唔出嚟,真係分分鐘會急死全村人,不過你話佢都無用,佢只會扮到好慘咁同你講:「哎呀我肚痛呀。」我初初都好傻仔咁信佢,但佢每次出嚟都係只會聞到香水味,唔通佢啲便便係香嘅!?

最慘係有時「廁王」入咗去好耐都唔出嚟,腦細又已經出過去望過個廁所幾次,然後我好不幸地喺「廁王」出嚟之後入去,三分鐘後出返嚟撞到腦細,佢就好唔耐煩咁問:「頭先係咪你喺廁所?」除咗好無奈咁答:「係。」之外,我係無嘢可以做到,唔通仲解釋話唔係呀頭先某同事去咗好耐咩。

平時如果我肚痛,整污糟咗個廁所,如果個位唔係喺水入面,我都會用紙巾抹返。但係有時啲嘢真係唔到你控制,例如有同事辦完大事,啲便便好唔生性咁痴咗喺廁格度沖極都沖唔走,然後我又入咗去,我去完都係會沖唔走,然後再下一個同事入去就會當正係我搞到個廁所咁樣,真係寶寶心裡委屈但寶寶不說。

畀人誤會事小,以下要講嘅先係堅嘢,話說有日我入到廁所見到塊廁板揭起咗,咁咪諗住放返落嚟囉,點知一掂塊廁板就成手濕晒,頂!原來廁板個面係全濕,但因為揭開咗淨係睇到背面所以完全唔知,我嗰陣除咗爆粗之外仲好想喊,因為直覺話我知嗰啲一定唔係水咁簡單,會造成咁嘅原因只有一個,就係有人痾濕晒個廁所,另一個人入去見到濕晒又唔想幫人抹,於是揭起佢先痾(呢個動作都有一定危險程度)。

平時我去廁所都會鋪紙巾先痾,因為廁板太多細菌,點知有次一坐落去,頂!涼涼哋嘅!原來係廁板內側又係濕咗,於是一坐落去張紙巾掂到又濕埋,堅係想死。自從撞過幾次板之後我都會抹得好乾淨再鋪埋紙巾,甚至係坐無影櫈痾,但係每日都要幫手人抹尿真係好嘔心,點解大家唔可以有返啲公德心!?其實喺街去廁所嘅情況係更加惡劣,詳請可以睇我嘅舊文《邊個話女人就唔污糟?》

去廁所小貼士

做大事前請放幾格紙巾落廁格,一嚟可以防止便便衝力太強激起幾重浪(水花),二嚟可以防止便便痴實廁格沖極唔走,減少尷尬。

最好關上廁板先沖廁,防止廁所水彈出,我試過走避不及彈中腳(著裙)。

去完廁所洗手抹手之後用紙巾隔住嚟開門,門柄係有好多細菌(雖然呢個我都好懶做)。

小盛女

image : collegehumor

啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *