如果要加班真係唔好應承去飯聚

如果要加班真係唔好應承去飯聚

「幾時出嚟食飯呀?」朋友A說。
「我最近好忙呀,成日加班,不如你哋自己食啦。」我說。
「我哋去啲任坐嘅地方咪得囉。」朋友B說。
「好啦,不過預我會遲,你哋食住等。」我說。
「得啦,咁約幾點呀?七點?」朋友A說。
「我起碼八點先到呀。」我說。
「咁約七點半啦。」朋友B說。

最後我當然不負眾望,加班加到傻之餘仲要臨拎袋嗰下再畀腦細叫入房,嗰種絕望真係,你懂的。雖然我一放工就即刻衝去搭地鐵,摩打腳咁行,但最後都成八點幾先到。途中當然不斷畀奪命追魂call同message轟炸,但係我都無計,唯有係咁叫佢哋食住先,其實去到餐廳大家都已經食得七七八八,只係有一樣嘢食係未郁過。

「咁遲,啲嘢食都凍晒,好食都變唔好食啦。」朋友A說。
「我有叫你哋食住等㗎。」我說。
「等你好耐,呢度有計時,得返半個鐘食,你咁遲先嚟搞到我哋食濟晒。」朋友B說。
「咁加班我都唔想。」我說,然後拿拿臨掃埋啲嘢食落肚。

話咁快公司就踏入咗peak season,成日都要加班,放工其實都已經好攰,唔太想出席飯局,而且都費事成日都要朋友等,所以盡量都推得就推,好熟嘅就另計。講真放工趕嚟其實都預咗食冷飯菜汁,但係仲要有說話聽真係有少少唔好受,重點係個飯局唔係我主動約,已經拒絕過又講明我會遲,諗諗下真係自己攞嚟賤,早之自己買個車仔麵返屋企食仲開心。經一事蔡一智,下次加班真係唔好再應承去飯聚。

P.S. 約咗朋友食飯,人哋食飽晒我先到;話咗返屋企食飯,最尾變咗留飯,好彩都未變帶飯,所以最近嘅文會減產,大家體諒體諒。

啱睇就Like埋我地個Facebook專頁

十分可愛(可憐沒人愛)的淑(熟)女,享受自嘲自諷的life style,仍然相信”Nothing is impossible”的老土金句。

Leave a Comment

Your email address will not be published. Required fields are marked *