低端乜乜

低端乜乜

成日講派位、講功課默書考試,應該悶死咗好多人。今日轉一轉,講“低端人口”。

我對中國國情同北京市情其實不甚了解,不過見到“低端人口”呢個字眼,我覺得好怪誕。低端者,low end 也,主要用嚟形容產品、服務、市場。人口幾時變咗做一件貨,要用高端/低端嚟分類?

根據報導, “低端人口”似乎唔係指“低下階層”,而係講緊“外省勞工”。如果我無理解錯,有北京戶口的話,點窮點兜踎都係唔會被驅趕。而家要趕係嗰班外地戶口嚟北京搵食,搞到北京人口膨脹嗰班。

眼不見為乾淨呢個做法真係好奇怪。北京就係有咁大人力需求,先至要請咁多人吧?要舒緩北京人口增長,鼓勵啲老闆響京城以外周邊地區開業,等勞工跟住份工遷出京城得唔得呢?(Sorry真係唔熟國情,呢個諗法可能很傻很天真)

講到呢度,唔好意思,我條思路又無可避免返翻去香港學校嗰度。根據掌權者思路,學校只不過係工廠,啤一模一樣的貨品出嚟,所以貨品(學生)絕對可以用高端低端嚟分。

間間學校都會有啲“低端學生”,即係成績差、TSA唔達標嗰班。即使係私校,未必間間會搵資源搵辦法幫學生讀好啲;比較功利、想做靚升中派位數據個啲學校,甚至會同北京一樣,就係搵方法趕“低端學生”走。見過有私校四班小一入去,得翻兩班小六畢業出嚟,另外嗰兩班學生去咗邊?自己諗。

如果係官津,有心無力又好,無心無力又好,因為學校無權踢學生出校(除非個學生曳到記到N個大過,但其實儲到六年班都儲唔到咁多),所以唯一可以做就係用分班制度將“低端學生”擺入一班,有良心有資源就動用額外師資幫佢地補底,否則分班目的就只不過係等“低端學生”唔好拖慢“精英班”進度(或曰由佢地自生自滅),等到佢地畢業就拋個波去中學,好行夾唔送。所以當我見到有學校行小班補底制度,我係真心欣賞同佩服架。

法律面前人人平等?因材施教有教無類?全部都係呃人架。

山地媽
啱睇就Like埋我地個Facebook專頁

山地媽,八十後,香港人,愛冒險。曾旅歐四年,邊讀邊玩邊打工,見盡奇人,做盡怪事。現為家庭主婦,兩兒之母。以為全職湊仔很平淡,殊不知原來又是一場冒險之旅。

Leave a Comment

Your email address will not be published. Required fields are marked *