好上司

好上司

K姐喺公司做咗十幾年,可以話係腦細嘅左右手,亦都係我見過全公司唯一一個夠膽窒腦細嘅人,但佢絕對唔係“老海鮮”,而且全公司大部份人都好尊重佢。

初初入嚟做嗰時都已經聽同事講過K姐嘅嘢,例如有啲同事話好想過去佢嗰TEAM,因為自己阿頭實在太廢、太卸膊等等,而我淨係覺得佢幾NICE,最記得係我有次返工搭LIFT見到K姐,佢都好好笑容咁同我講早晨同問候咗我幾句。

前排終於有機會跟K姐做嘢,因為公司接咗單大嘢,由K姐TEAM人負責,後來K姐要求加人,腦細就落ORDER叫其他TEAM調一至兩個人過去幫手,我都唔知點解會被抽中,我嗰TEAM嘅同事個個都話想同我調,當然最後都係由我過去啦。

過到去我至明白,點解其他人想跟K姐,除咗有實力之外,其中一樣幾特別嘅,我未見過佢鬧下屬,比著其他阿頭,無論係唔係你錯都會鬧咗先,但我喺度幫手咁耐,未見過佢鬧過人一包,即使有同事做錯嘢,佢都只係叫同事改返,呢樣已經好加分。

K姐亦會好用心咁教你做嘢,其中一個例子:我要做一份未做過嘅文件,雖然已經有同事教過點做,但我做極都有嘢錯,同事放哂工我都未走,佢見我差不多九點都未走,就同我一齊砌返好份文件(其實佢仲有好多嘢做),之後仲話剩返嗰啲第二日再做,趕我走要我放工。

另外有次開會,本來K姐都已經講咗之後啲工作嘅安排,有同事提出另一個意見,K姐聽完就讚個同事好細心,仲話自己都忘記咗嗰部份嘅細節,之後就跟返同事建議嘅地方修改。

我都無想像過作為上司,可以對下屬咁好,又會當面咁讚同事,喺我本身嗰TEAM從來都未試過,雖然我阿頭都未至於黑人憎,但最少未聽過佢會讚我哋囉。

跟咗大半年後,個PROJECT終於完成,K姐請哂全部人食飯,嗰晚K姐同我哋一齊玩,大家都玩得好開心,之後K姐讚咗我幾句,仲鼓勵我出去進修,話學咗嘅嘢將來實會用得著。當然我都有聽佢提議出去進修,發覺都真係幾幫到我而家做緊嘅嘢。

一個無架子,又玩得埋,又會教你同鼓勵你嘅上司,都真係世間難求,因為由自己同事,或者朋友口中聽到嘅,都發現大部份嘅上司都唔太好,有啲甚至乞人憎,所以當真係遇到好上司,請好好尊重佢,同喺佢身上學習一下,一定對你有幫助。

 

Photo: internet

作者: 一平

啱睇就Like埋我地個Facebook專頁

歡迎各位讀者踴躍投稿,來稿請電郵至 info@menjap.com

Leave a Comment

Your email address will not be published. Required fields are marked *