指定髮型師

指定髮型師

剪頭髮係我每個月嘅指定動作,剪得唔好隨時會影響整個月嘅心情,加上剪得好就無謂轉,因此自出嚟做嘢之後,只要我覺得滿意,我就會繼續搵返同一個髮型師。

而家呢個髮型師寶哥,已經同我剪髮有十年時間,記得當年去開嗰間髮型屋突然執咗(嗰間我都已幫襯咗差不多三年),唯有搵附近嘅髮型屋剪頭髮,咁啱遇著寶哥,佢好細心咁剪之餘,仲解釋返點解咁剪,例如配合返我嘅頭型嚟剪,Detail位係點等等,最後介紹埋自己,俾埋張咭片我。咁耐以嚟我都未試過有個髮型師會咁樣同客解釋咁多,而寶哥當時咁做,確實令我佢係好用心咁同我剪,而且又真係剪得幾好,於是我就開始搵寶哥剪頭髮。

根據寶哥所講,佢係全間髮型屋搵錢最多嗰個(當然亦係收得最貴嘅其中一個)。因為只要係搵指定師傅嘅客人,髮型屋就會同髮型師有一定比率嘅拆賬,客愈多,賺嘅錢自然愈多。(所以點解髮型屋要指定師傅通常貴啲)

最初我以為寶哥一定好多女仔客,因為女仔整一次頭,閒閒哋都幾百蚊,男仔洗剪一次都係百幾,照計應該做女仔客好賺過男仔客,但寶哥話原來佢嘅男女客比例係7比3,男仔客反而佔多數,仲有,寶哥話自己鍾意做男仔客多過女仔客。

寶哥認為技術要進步,就一定要經常去剪,然後去諗點樣可以再好啲,同埋根據返唔同客人嘅職業或要求嚟剪返適合嘅髮型。好多時男仔客(指WALK-IN客)嘅要求都係大同小異,有時可能都係嗰幾種剪法(例如側邊後邊偷薄、前面修一修、少少碎等等),寶哥唔單止配合,仲會嘗試加少少自己嘅諗法,同埋一定會詳細解釋,務求令客人覺得同以前有分別,目的只有一個──希望個客再搵返佢。

再者,正因為男仔客嘅要求大同小異,有啲髮型師就唔太鍾意做男仔客,但寶哥認為呢個就係機會,一來可以令自己技術進步,二來男仔剪髮嘅時間比女仔短,一個女仔客可能已經等於兩三個男仔客,到月尾埋單,剩係睇人數都已經贏咗。

另一方面,雖然女仔平均整一次頭都唔平,但普遍嚟講,女仔比較少會好密咁整,可能幾個月至去修一修,或者某時某刻去染髮、電髮一次等,但男仔平均兩個星期至一個月多數都會剪髮(唔計做其他電髮、染髮等),所以只要儲到一班穩定嘅男仔熟客,計起上嚟點都有賺。

搵得指定師傅,多數都預咗要俾貴啲,但既然剪得好,俾貴啲又何妨?試過有次同朋友去剪髮,佢見價錢平就叫埋我一齊去試,咁啱我又要剪,就即管試吓,剪完之後我已經覺得有啲怪怪哋,不過因為當時GEL咗頭,以為係效果,但返屋企洗完頭吹乾後,發現真係好唔掂,之後嗰一個月我勁唔想照鏡,而且又要日日GEL頭GEL好似比達咁至可以返工,捱咗一個月之後,我都係搵寶哥幫我剪返好。

可能喺好多人眼中,我嘅髮型每次都差唔多,當然寶哥都唔會每次有新嘢,特別當嗰日特別多客搵佢嘅時候,但每隔一段時間,我都會留意到寶哥有啲嘢唔同,例如剪髮、“蠟頭”嘅手法唔同咗,令到出嚟嘅整體感覺有分別(真係要當事人至睇得出),好似將剪髮變成一門藝術咁,總括嚟講,每次都總會令我滿意。

 

作者: 一平

啱睇就Like埋我地個Facebook專頁
歡迎各位讀者踴躍投稿,來稿請電郵至 info@menjap.com

Leave a Comment

Your email address will not be published. Required fields are marked *