《進擊》【第21回:你別無選擇 (I)】

《進擊》【第21回:你別無選擇 (I)】

永與Shirley收到那些資料後,振永正想從地下室離開時,Shirley卻截停了振永,並問梁:「但係有個問題要解決喎。」

「咩啊?」梁正想叫傭人把桌上的東西收拾好。

「我哋拎住呢啲嘢,好危險了,我點知我哋會唔會無啦啦俾人隊冧㗎!仲有喎,你而家講到咁信我哋姐,點知會唔會又係你嘅陰謀嚟?」Shirley緊張地說。

「唉啊小姐,你要點講我先肯信呢?我個仔都冇埋啦,仲可以點樣玩你啊?」梁不耐煩地回答Shirley。

Shirley向振永說:「我點知會唔會其實個仔係未死,攞嚟送我哋死㗎?」

振永這時截停了她,但他內心其實都半信半疑,「咁我有個要求要你應承。」

「你哋兩個係咪睇得電影多得濟呢?有咩要求啊?」

「你要俾跟開我嘅同我一齊行事,當係助手咁。」Shirley聽過後心裡讚嘆振永的機靈。

「唉好啦!又係嗰個大隻佬啊嘛?仲有嗰pair蛇quei到不得了嘅男女。」

「係啊,俾埋佢哋跟住我哋啦,我哋當佢哋係保鏢㗎啦。」

「仲好啦,我慳返啲力唔洗搵人磅住你。」這時梁到處走走,抹抹賭桌上的灰塵,然後示意叫振永及Shirley離開。

他們離開地下室之後,振永即時打了個電話給Justin,打算問問他在哪裡,但他的電話一直沒人接聽。他們唯有先坐車回到振永家,然後再想想辦法。在車途中,他們倆不斷回想梁跟他們說的話,默不作聲。難忍寧靜的Shirley率先開口向振永表達她的想法。

「我諗嚟諗去,我都係覺得成件事好唔妥,佢話佢個仔因為新安義而死姐,咁就令到佢想做返好人?好似有啲牽強喎,你知呢啲人眼中得錢㗎姐,只要邊個俾到多錢佢地,佢地就做邊個隻狗。我好驚佢哋係為咗令我哋冇得再報仇而設嘅局囉。」Shirley不安地說。

「其實,我都一直半信半疑,但係我睇過佢俾我啲嘢,有唔少係我哋做節目個陣一直搵唔到嘅料。數字係唔係百分百一樣其實我都確實唔到,至少發現呢樣之後,我暫時信咗先啦。」

Shirley這時突然煞停了車,驚訝地問:「竟然有我哋當時搵唔到嘅嘢?邊度啊?做咩唔話我知。」

振永拿起放在旁邊的公文袋,拿出了其中一疊資料遞給了Shirley,回答說:「你睇吓呢份啦,我哋本身咪諗過做橫洲單嘢嘅,你仲記唔記得橫洲咩事先?」

「點會唔記得呢,你估我係做完一集就算嘅人咩?」

「咪係囉,本身橫洲塊地有33萬公頃喺攞嚟起公屋,點知梁特就突然改咗得3000公頃,成大塊點分都係冇人證實到,呢份嘢就係講緊點分帳。」

「記得。哈!呢份嘢又好似堅堅哋,咁其他嗰啲都係一陣先睇啦。喂,Justin係咪仲未聽電話?我哋不如叫住Daniel同Miki上嚟傾下先?」

「係啊,都唔知佢搞乜。好啊,你打埋俾佢哋就上去我屋企啦。」

正當Shirley打起電話時,電話就響起了,竟然是Daniel打來⋯⋯

「喂?」

「Shir…Shirley?」

「咁啱啊,我哋都有事搵你,喂,做咩咁耐唔搵我哋啊。」

「唔⋯⋯唔好講住,你有冇睇電視?」

「我同振永喺出面喎,發生咩事?」

「你開吓新聞睇吓啦。」

Shirley示意叫振永開一開電話上的電視直播,然後就看到這個畫面:

「警方最近為近期的網絡犯罪進行一連串的搗破行動,其中搗破一個在菲律賓設立總部的詐騙集團,涉及金額3億港元。另外,一名30歲男子涉嫌『不誠實使用電腦』被拘捕,消息指他曾經利用黑客技術入侵多個政府部門的伺服器,盜取重要的機密資料,警方透過反黑客技術成功偵查該男子的地點,從而成功搗破黑客攻擊。」

「呢⋯⋯呢個咪係Justin?」Shirley指著電話屏幕驚訝地說。
(待續)

 

facebook

啱睇就Like埋我地個Facebook專頁
香港土生土長的人,就讀於嶺南大學文化研究系。關心社會,熱衷於研究各樣文化及現象,熱愛研究韓國文化。

Leave a Comment

Your email address will not be published. Required fields are marked *