不接廣告只能等死?│網絡作家秘辛

不接廣告只能等死?│網絡作家秘辛

上一篇文〈接廣告原來很好賺!?你怎麼不接?〉講到接廣告咁慘,於是有好多作者索性避得就避。但問題係唔接廣告,你要吃大便嗎?
有啲「清流」作者就會反駁我話:「誒!寫文係興趣黎,唔一定要講錢既。柳臣你淨係講錢真「俗」!寫文淨係為錢,證明你對寫作無熱情,無愛,bilibala,唔係真心鐘意寫野etc。」

我老實話你聽,我如果沒有熱情,唔鐘意寫野,早就唔寫落去啦!
我就係鐘意,先可以一路堅持到而家,唔只我,每個而家仲用微薄既稿費,可憐既廣告費黎支持自己寫緊文既作者都一樣。佢地對創作既愛同熱情早就超過你能夠想像。
但正正係因為鐘意,先會想方設法生存落去。
因為熱情係唔會飽肚。
你有沒有考慮過,你住既地方要不要錢?你食飯要不要錢?你手機充電要不要錢?打字既電腦要不要錢?網絡wifi要不要錢?
唔講到要住咁遠,甚至每朝起身刷個牙煮個早餐要不要錢?
當一切都建基係錢之上既時候,寫作唔講錢,你有幾認真看待自己做緊既野?你自己都唔尊重自己既文章價值既時候,你憑咩去要求其他人尊重你既文字?
作者唔講錢你養佢地嗎?
小心輕看一直有作者訂閱計劃,但係願意養作者既讀者少之又少,到目前為止,連訂閱目標既1/3都達唔到。
如果可以做到由讀者養活作者,作者就能夠以作者為職業生存下去,而唔需要每日都花大部份時間去思考點賣幫廣告商賣廣告。
無論係搵一份正職,然後閒餘先黎寫野;定係主要幫廣告商寫廣告,然後剩番落黎既時間先寫自己文;都肯定唔及全職專心寫作做出黎既作品高水準。
所以如果話第三條出路,除咗稿費、廣告費兩條路之外,讀者先至係最能夠決定作者可以花幾多心思係寫作上既人。

假設一個作者有一萬個讀者,只要有1/10人肯真金白銀支持佢,就有一千人,每人每個月只需要投資$3蚊係呢個作者身上,呢個作者每個月就可以有固定三千蚊既收入,亦姐係話如果你當「作者」係一間「作者有限公司」,讀者每月只需$3蚊既付出,就可以獲得呢個作者三成既股權。(唔知呢三成係點計可以睇番Fanpiece作家要創造多少流量才活得下去!?〉篇文)
唔好睇少呢$3蚊,已經可以令你睇少好多廣告,睇少好多呃like文。讀者們即管可以當呢隻係一隻免費game,花$3蚊移除廣告。
再理想化啲,如果花$9蚊呢?甚至可以買下整間「作者有限公司」,到時讀者就係作者老闊,你想睇咩佢就全職寫咩你睇。只係9蚊就可以買起一間「公司」,買六合彩都無咁平啦!
再問一次:作者唔講錢你養佢地嗎?
►►小心輕看作者訂閱:https://goo.gl/forms/EtCaF1t2ZGjgWj812

我知道有作者好有錢,唔等錢洗,寫作為興趣,又或者佢覺得只要好多人睇,好多like同share,都可以證明到佢既價值。
呢啲作者就好似叫人免費拍戲然後睇網上版既人一樣,你試下同marvel既演員講,你拍戲都係為興趣姐,唔一定要收錢既,有人鐘意咪得囉!又或者你同高比講,你打波都係為熱情姐,冇錢收都可以打波架。
當然可以,但係呢個就係專業網絡同業餘既分別。
一個有熱情既人,係將件事當係自己既專業,投注一切;一個玩玩下既人,先會只為興趣業餘呃like。
你真係想做好網絡作家呢份工,就努力去搵錢,然後以你喜歡既身份,以呢個職業最自豪既方式生存落去。

所謂發財立品,係有次序,先發財,後立品。你有錢唔憂柴憂米,自然可以鐘意點寫就點寫,唔講錢就唔講錢。
唔講錢既前提係,你有錢。最後你咪又係要搵,憑咩作者要係其他行業搵錢貼黎寫作?唔通連作者自己都覺得自己唔值錢咩?
最後贈作者們一句:時窮節乃現,唔係人窮節乃現;時窮節乃現,人窮勤搵錢。

 

Photo: internet

facebook

啱睇就Like埋我地個Facebook專頁
柳臣 一個喜歡寫作的香港人 能創作就是幸福於是我開始了我的幸福之旅

Leave a Comment

Your email address will not be published. Required fields are marked *