我係一個好仆街嘅主人

我係一個好仆街嘅主人

通常小學畢業都會去下camp,但係好可惜我哋學校無呢啲,只係成班同學仔去海洋公園食lunch,我記得我最好嘅朋友婷婷一見面就送咗份禮物畀我,仲千叮萬囑我要返到屋企先可以拆,又話唔知過咗今日之後幾時先有機會再見面,後來我食食下飯發現大髀涼涼哋,於是打開個袋睇,原來份禮物已經滲緊水,張花紙都霉晒,我唯有被逼拆開份禮物嚟睇。

「吓!烏龜!?」我驚訝地說,呆望住嗰半個水樽入面嘅龜仔喺度爬來爬去。
「係呀,我知你之前隻龜仔死咗好唔開心,所以特登買畀你㗎。」婷婷說。
「點解你唔一早話我知呀,而家濕晒喇。」我說。
「我諗住畀個驚喜你吖嘛,鍾唔鍾意呀?」婷婷說。
「鍾意!」我笑說。

話說我好細個嘅時候屋企養咗一大一細嘅烏龜,細個唔識嘢,成日用手指搞到啲水有漩渦再掉隻細龜入去氹氹轉,覺得好好玩(千其唔好學!),唔知係咪因為咁所以佢好快就死咗,媽咪亦都將隻大龜送咗畀人,諗住從此唔再養烏龜,但係估都估唔到婷婷會喺畢業嘅時候送一隻畀我,於是我屋企又無啦粒多咗隻龜仔。

最初我都有好好照顧佢,餵佢食嘢,但係耐咗我就好少理佢,變咗父母照顧,直至我發現佢開始唔食嘢,隻眼成日合埋,我先開始識驚,上網查先知原來佢患咗蒙眼症,我想帶佢去睇醫生,但父母當然彩我都傻,因為睇一次獸醫生分分鐘成千蚊,買隻新龜都係一百蚊,於是我就拎晒我所有積蓄,帶埋個魚缸山長水遠咁入大圍帶佢睇醫生,之後晚晚同佢查藥膏,買過一個好大嘅玻璃缸、浮枱、暖管同UVB燈,無幾耐佢就好返,仲極速變到好大隻。

而家已經過咗十幾年,最近幾年我又固態復萌好少理佢,然後佢又再次病咗,唔食嘢,隻手爛肉,雖然發現咗之後我已經即刻帶佢睇醫生,但係驗血同照超聲波後發現原來佢仲有好多問題,例如貧血同積咗好多卵泡,醫生話個缸太細,佢想爬出去所以整損隻手,話要好似睇動物嗰張醫生枱咁大,講真,屋企邊有咁大?印象最深刻係第一晚幫佢查藥膏,睇住佢隻指甲斷咗流晒血,好心痛,但係阿Mike在場,我就死忍忍到夜晚瞓覺先偷偷地喊。

而家每日都極度自責,因為係我疏忽照顧先會搞到佢咁,如果早啲做research,換密啲水,唔好放工返嚟同佢say個hi就走咗玩電腦,佢就唔會咁,係我累咗佢,係我仆街,所以我想藉住呢件事奉勸大家:

千其唔好送動物畀人
養動物係一世,唔好三分鐘熱度,一定要好好照顧佢哋
動物嘅壽命一定畀人短,要好好珍惜同佢哋相處嘅時間
千其唔好為咗培養小朋友有責任感而養動物,因為好多時都係變咗父母或工人姐姐照顧

P.S. 其實同時間我隻狗都病咗兩個星期,已經睇咗五次醫生,成家人都身心疲累,希望狗狗同龜龜都可以快啲好返。

 

facebook

啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *