點解腦細往往要等員工辭職先肯加人工?

點解腦細往往要等員工辭職先肯加人工?

「唉,又有人走喇,又要請人。」人事部經理Macy說。
「今次又到邊個呀?」我說。
「設計部個Natalie囉,佢話朋友介紹份工畀佢,五天工作,有醫療,仲要保晒佢全家,有十五日大假,有雙糧仲有花紅。」Macy說。
「嘩,畀我都走啦!我哋得十日大假,長短周仲要無病假無雙糧喎。」我說。
「其實公司對佢都幾好,話加到同佢新工一樣價,但佢都係唔肯留低。」Macy說。

腦細都有一個通病,就是永遠覺得自己已經對員工好好,員工一定不會離開公司,平日即使你做到101分,他也只會覺得是理所當然,然後當你有一天說要辭職的時候他才會突然發現你的好,並心想:「死喇,平時阿邊個一個頂十個都係出一份人工,仲要人工唔高,佢走咗分分鐘要請兩個人返嚟頂,咪蝕晒!」於是這時腦細才會加你人工,甚至加到和新公司一樣價,再打人情牌,和你說:「做生不如做熟啦!我一直都睇好你㗎!」哄你留低。

在員工層面來看,辭職前一定是已經想得很清楚,平日努力工作也得不到回報,人工加幅追不上通脹,加你幾百元已經好像是皇恩浩蕩要下跪似的,並說:「公司對你已經好好㗎喇,唔係個個都有得加。」要你感恩,比以往更努力,做得更多做得更好,但無奈地其實那個所謂的加人工只是追平通脹。老老實實,返工為乜?為錢囉!不要和我說感情,返工是很現實的。

「Natalie,係咪公司畀咩offer你都唔會考慮留低喇?」Macy說。
「我喺度為公司仆心仆命,每晚加班嘅時候公司無珍惜過我,到而家要我走喇先留我,你覺得有用咩?」Natalie說。
「其實公司真係覺得你做得好好,只係之前太忙唔得閒review住。」Macy說。
「唔好玩啦,我都喺度做咗幾年,就算review咗,人工加幾多我心裡有數。」Natalie說。

即使你最後真的因為offer吸引或念舊而留低,腦細又會覺得你在「跳草群舞」,故意說要辭職令公司加你多些人工,而且你已經試過辭職一次,腦細都是小氣記仇,會覺得你的心已不在公司,不夠忠心,往後的日子也不一定好過。

其實只要腦細賞罰分明,那有員工想轉來轉去?轉去新公司所有事又要從新適應,公司請新人回來又要從頭教起,根本是雙失,我實在不明白腦細為何年年賺天文數字,也不願意加多少少給員工,或許真的要姑寒至此才能當腦細。為何我這麼憤怒要出千字文?因為我已經一年多沒有加過人工!但工作就不斷加!唉,看來新年後我又要加入逃亡潮了。

image : linkedin
啱睇就Like埋我地個Facebook專頁
十分可愛(可憐沒人愛)的淑(熟)女,享受自嘲自諷的life style,仍然相信"Nothing is impossible"的老土金句。

Leave a Comment

Your email address will not be published. Required fields are marked *